一向敢言的葉德嫻去年直指對特首梁振英冇期望，前晚她在紅館開騷，懶理特首夫人梁唐青儀在場，借題發揮叫觀眾要保持權益，大呻樓價高昂令新一代境況淒涼，並高呼：「大家唔好怕上街，做呢啲事好正確。」
葉德嫻一連三場「Deanie Sing for me2013葉德嫻演唱會」前晚在紅館揭開序幕，她佩戴總值2,000萬鑽飾大唱金曲，特首梁振英夫人梁唐青儀也有捧場。葉德嫻準時8:15pm出場，並圍住觀眾席行一圈巡視，獻唱兩首歌後，她才讓遲到的觀眾進場，並質問說：「你做乜遲到？有乜事？塞車呀？都係坐上面啲觀眾乖啲，樓下就曳，我以前都鍾意遲到，仲有個名叫葉例遲，不過嗰時係自己要去唔鍾意嘅地方，想避先遲，遲到好乞人憎，要改。」
前晚身穿McQueen戰衣嘅葉德嫻，明知特首夫人梁唐青儀坐喺觀眾席，仍高呼上街有理！葉德嫻赤腳唱《赤子》。
倫永亮大讚葉德嫻是香港樂壇已面臨絕種的歌手。
「好多人好淒涼」
65歲的葉德嫻出名敢言直率，老馬有火的她去年曾批評香港唔適合人住，梁振英當選特首後，葉坦言對他沒期望，直言要自求多福。前晚葉德嫻懶理特首夫人在台下，當獻唱《輕輕嘆》時因感不滿意而要求重唱，之後更借題發揮說：「唱得唔係咁好，你哋應該叫回水，或者到消委會投訴，要保持權益。」
葉德嫻望向台下，指梁振英沒有到場，她說：「講僭建嗰啲，有啲人真係要搬張床喺街瞓，屋企個位只夠放沖涼缸同廁所，冇位瞓，惟有出街瞓，所以我哋要爭取，唔使驚，唔會被暗殺，納唔納稅都好，香港人要打算，好多人好淒涼，尤其係新一代，有啲人想做裁縫，但成一萬蚊呎樓，有乜地方放到咁大張裁床？政府要幫吓啲人，大家唔好怕上街，做呢啲事好正確，唔使驚。」而特首夫人認真馬不停蹄，昨午又到太古城擔任伸手助人協會的活動主禮嘉賓。
葉德嫻指今次有可能是她最後一次的演唱會，她說：「我喺度講聲保重，好似遺言咁㗎，總之大家見得一次就一次。」她自爆陳芷菁託人請她試骨膠原重生，她直言有去試，用後感覺皮膚有彈性，她更爆料說：「有個女星話咁多戲拍，佢唔識做戲，只係生得靚，人靚就有allowance，做壞事都冇問題。好在我啲肉dum墮，但都拍到嗰套戲（指《桃姐》），真係行尾運。」葉德嫻表示曾想邀請林振強合作做音樂會，但到他離世都未有機會，她說：「真係陰功，佢死得咁早，我願意用我嘅壽同佢換，真係好傷感。」
葉德嫻個唱曲目
《幸運是我》、《你留我在此》、《天天都相見》、《黃色的街燈》
《輕輕嘆》、《等不到是你》、《不再分離》
滄海遺珠Medley：《夜潮》、《任你鎖住我》、《可人兒》、《心裏的春天》、《白信封》、《活著是為愛》
《飄》、《千個太陽》、《讓過去過去》、《好東西》
《不捨也為愛》、《變》、《何日》、《心仍是冷》、《沙沙的雨》
林振強Medley：《細水長流》、《春夏秋冬》、《每一個晚上》
《倦》、《Al Di La》、《All of my life》、《赤子》
《如果沒有你》、《明星》
Marvin Medley：《Mercy mercy me》、《What's going on》
《What the world needs now》、《If you love me》
《I'd rather leave while I'm in love》
from:
http://hk.apple.nextmedia.com/entertainment/art/20130310/18190213
