59歲朱咪咪近期爆紅，除在《老表，你好嘢！》做「夢露老師」出位外，連同《初五啟市錄》的事頭婆和黃昏檔的《王老虎搶親》都見到她，成三線劇同播紅人。
電視晚晚見，加上朱咪咪今個月的紅館騷，兩場夾埋只賣剩少量單丁位，銷情贏天后級人馬甄妮和葉德嫻足足幾條街。
為了以最佳狀態開騷，朱咪咪除日做五粒鐘瑜伽外，更要閉關十日。「開騷前我會匿喺屋企，唔開口同人講嘢，就算口臭都要忍吓口！」
互動片段
失聲陰霾 朱咪咪戒油戒辣
拉筋搏老命
朱咪咪平時少做運動，齋做事前拉筋動作，已辛苦大嗌：「斷啦、啲骨斷啦！」辛苦錢確係唔易賺。
苦練軟骨功
朱咪咪由上個月開始請師傅教做瑜伽，有跳舞根底的她，上了兩堂已成功做到軟骨效果。
剛滿59歲的朱咪咪，戲裏永遠做丑角，搞笑、核突走唔甩；戲外卻是唱家班，由最初夜總會跑江湖到近年踏紅館，場場爆滿。她將於月尾在紅館舉行兩場個唱，門票開售短短兩日已賣出九成，現時只剩單丁位，一票難求，就連朱咪咪亦覺難以置信：「其實之前兩次紅館騷，賣飛都唔錯，但都唔及今次。可能有電視劇效應啦，真係要多得無綫夾啱時間。」
銷情理想，主辦商張耀榮曾建議添食，但朱咪咪卻堅持唔制，「咪搞啦，開次個唱真係辛苦到阿媽都唔認得，我賺到都冇命享，你哋當我唔等錢使啦！」相比同期開騷，但銷情一般仍堅持要加場的甄妮，朱咪咪寧願賺少啲樂得自在。
贏開巷
記者日前在通利琴行售票處，發現月尾開騷的朱咪咪，現時只賣剩單丁位；相反比她早三日開騷的甄妮，仍有大量貴價飛求售。至於三月初開騷的葉德嫻，最貴門票開價$780，比朱咪咪和甄妮貴，但貴飛平飛都仍在發售中。
擘腿單腳企
拉筋嗌到鬼殺咁嘈，但朱咪咪仍頂硬上做金雞獨立，「因為opening我要舞獅，點辛苦都唔想衰俾人睇。」而今次演唱會，朱咪咪將會邀請金剛、蘇基做嘉賓。
清茶淡飯
平時大魚大肉的朱咪咪，為了減磅，近日每餐都以青菜配米粉或白飯為主，頂盡加碟微辣的涼拌青瓜調調味，食得十分清淡。
日食八個橙
現時朱咪咪的正餐除了食菜外，亦要日食八個橙和半磅提子，吸收維他命C。
廟街皇后揮低頂級天后
朱咪咪在《老表，你好嘢！》中做夢露老師，角色笑中有淚，造就她輕易上位。
唔少歌星發夢都想在紅館開騷，廟街賣唱出身的朱咪咪，近年竟然成為紅館常客，而買飛捧她場的，絕大部分是朱咪咪昔日在廟街擺檔時的顧客。「我喺廟街唱親都係徐小鳳啲歌，可能把聲似佢啦，啲客叫我做『廟街皇后』。咪睇小廟街啲客仔，佢哋真係好長情，大部分都跟咗我30年。而且佢哋好豪，嗰時我收貼士都收到手軟。」
對於廟街跑江湖卻撼贏樂壇天后甄妮、葉德嫻，朱咪咪即謙虛地說：「其實邊有得比，大家風格都唔同。佢哋係唱功見稱，我係搞笑通俗，各花入各眼啦！」
月甩20磅
跑了多年江湖的朱咪咪，早前特登過大海為江湖猛人崩牙駒（尹國駒）媽咪慶生，更因此上港聞版。「駒哥媽咪好錫我，佢年年生日都係我做司儀，可能我有老人家緣啦！」
肥底朱咪咪以往唔肥唔食，但為了今次個唱減肥膏開騷，近日只食白飯青菜。上月開始，她更每日練足五個鐘瑜伽，短短一個月已成功甩掉20磅。靠聲搵食的她，更要在開騷前做「拉鏈嘴」養聲。「平時少做運動呀，依家每日師傅都要我行八層樓梯，行完上去我都想死。氣都未喘完就要壓腿紮馬，攞我老命咯！不過呢個未算最難頂，我平時唔講嘢會死㗎，但我知講嘢仲傷聲過唱歌。為咗把聲靚啲，開騷前十日我要做啞女，唔同人傾偈。雖然唔講嘢會口臭，不過今次都要忍吓口囉！」
另類拉票都輸
近日朱咪咪、甄妮與影后葉德嫻同時為自己個唱宣傳。早前甄妮出口術鬧後輩G.E.M.，綽頭十足，但無助賣票；至於行動型葉德嫻，拍音樂特輯兼做無綫頒獎嘉賓，可是直至上周四（7日），開賣五日仍大把票剩。二人的銷情明顯不及以搞笑通俗為主的朱咪咪。
爆女兒生父
1月初在台灣接受節目訪問時，甄妮自爆女兒Melody是用傅聲的雪藏精子成孕，又透露曾4度流產兼食香爐灰求子，事件引起極大迴響。
鬧G.E.M.無家教
一向有鋪鬧人癮的甄妮，早前無情情公開鬧爆同有「巨肺」之稱的G.E.M.，直斥對方無家教。事後G.E.M.怕米貴，在微博向前輩道歉，但甄妮依然唔收貨，指對方冇道歉。
為無綫台慶撐場
甚少返娘家無綫的葉德嫻，為宣傳3月的個唱，去年12月罕有應承為《萬千星輝頒獎典禮2012》任嘉賓頒獎給「視帝」黎耀祥。台慶後，葉德嫻再亮相無綫，做個人音樂特輯《得閒講德嫻唱》，唱足一晚，預演個唱，為銷票乜都肯制。
