甄妮在facebook狂插「房東」吸毒要加倍嚴懲，繼向太陳嵐出面怒轟甄妮狠毒後，昨日凌晨後輩吳國敬都在微博暗寸，指留意到甄妮發表的「偉論」，有感而發作了首歌叫《世紀老八巫》。阿敬昨日接受電話訪問，寸爆在新加坡開騷的甄妮：「好討厭，餐餐做騷出嚟鬧人博見報，但呢單黑心咗啲落井下石，好毒辣好嘔飯好核突。」
阿敬揚言搵志同道合朋友填詞，歡迎群星合唱，他說：「表明立場我同祖名父子冇乜交情，今次純屬睇唔過眼甄老太行為，抽水唔好咁毒辣，人誰無過，何必呢個時候踩多一腳。」至於甄妮昨在fb隔空反擊向太，還謂：「甄不會讓自己的孩子做藝人，那不是正常人可承受的苦。」
吳國敬作了首《世紀老八巫》寸甄妮（右圖），還歡迎群星合唱教訓「前輩」。資料圖片
林子祥話祖名乖
此外，林子祥昨日到西九出席活動，坦言由細睇到祖名大：「佢係一個好開心好乖嘅細路，只係錯咗一步。」問有否提醒兒子林德信？他說：「以前都有叫佢小心，佢話一早知禍害，對佢好有信心。」
採訪、攝影：皓騫、黃曉妍
From:
http://hk.apple.nextmedia ... 140825/18843356
