吳國敬一連兩場「敬．愛音樂30載作品展」前晚在紅館開鑼，Big4四子許志安、張衞健、梁漢文和蘇永康，以及陳慧琳、黎瑞恩、張智霖和劉浩龍等為阿敬擔任頭場嘉賓，阿敬女友Elaine和蘇永康的太太則在台下睇騷，前晚是康仔太太生日，阿敬帶頭唱生日歌賀她。
爆醉酒周圍咀
與阿敬識於微時的張衞健，以棟篤笑形式打開序幕，爆阿敬醉酒亂說話：「佢飲大兩杯仲恐怖，唔理係人定狗，又攬又錫，仲會話I love you baby，上次蘇永康結婚見佢攬個女人，我一個箭步出去，原來嗰個係我老母，阿敬仲錫埋佢塊面。」
接着劉浩龍、黎瑞恩、陳慧琳和張智霖出場與阿敬合唱，Big4四子再陸續出場。張衞健問阿敬有否情深說話要說，阿敬表示臨死前想錫他一啖，結果錫完張衞健的臉再錫嘴，全場立即起哄。張衞健笑說：「我哋由小學一年班同班識到𠵱家，每年食團年飯見到佢，內地做完嘢返嚟食飯都會叫埋佢，但咁多年都冇埋一次單！」他續說：「不過我認定阿敬係最好朋友之一，我試過差幾百蚊先可以過到嗰個月，雖然佢成副身家只有一千蚊，但都借咗一半畀我，佢真係一個值得深交嘅人，本來今次我諗住唔收錢，點知喺後台有人畀幾皮嘢我，原來係化妝整頭錢。」
Big4與吳國敬感情如兄弟般。
阿敬女友（左）和康仔太太前晚去到捧場。
金錶利誘作歌
康仔在台上則說：「我哋識咗三十年，友情係僅次張衞健，1998年喺超儀屋企，阿敬好嬲話俾人reject歌，叫我哋聽吓首歌，當時陳奕迅聽頭兩句已經出咗去煮麵，許志安伉儷喺度玩手指，結果我就要咗，點知歌有歌運，將我十三年事業第一次推上紅館。」該首歌曲便是當年令康仔事業推上高峯的《越吻越傷心》，之後康仔送了一隻藍色勞力士給他，阿敬笑稱「藍撈」不好意頭，康仔笑說：「嗰次係前妻幫我買，佢唔知咁多口音，但如果你𠵱家幫我作首歌，現任太太係香港人，佢會買金勞。」
採訪：盧妹
攝影：仇志德
一連兩場的吳國敬個唱氣氛熱烈。
黎瑞恩一身鮮艷服飾在台上獻歌藝。
from:
http://hk.apple.nextmedia ... 150406/19102449
