甄妮（左）同圓潤咗嘅囡囡Melody買完嘢，攞住戰利品喺門口排隊等的士。
【中環】現年60歲嘅甄妮一向惹火，講嘅唔只係佢嘅身材，仲有佢嘅言行。好耐之前甄妮試過同當時徒弟王馨平嘅老竇王羽開過火，又批評後輩鄧紫棋（G.E.M.）冇禮貌，近日佢喺台灣桃園龍潭嘅農場門口起咗一道鐵絲圍欄，仲喺現場寫咗啲大紙條話「社會敗類，已抄下你車牌交政府處理。」原來係有人喺佢嘅私家地亂泊車。不過，無論如何甄妮都係一個好媽媽就冇爭議嘅，佢對囡囡甄家平（Melody）照顧無微不至。
兩母女喺時裝店入面有傾有講，交換心得。
正值內地黃金周，等的士嘅人大排長龍。
前日下晝兩點左右，甄妮同囡囡Melody去咗中環置地廣場行街濕平，兩母女喺各間名店行來行去，其間有傾有講互相交流意見，最後買咗一大袋戰利品去咗廣場門口嘅的士站排隊等的士。由於好多人，所以要排好耐，就咁睇，着住便服嘅甄妮比26歲熱褲示人嘅囡囡Melody，睇落仲fit。
Melody好友鄭欣宜最近都肥咗，唔知佢哋會唔會約埋一齊減磅呢？
脹過欣宜
記得大約半年前兩母女喺ifc濕平，Melody𠵱家似乎又肥咗唔少，手臂仲粗過媽咪，小肚腩更加唔使講，肥得嚟好有外國鬼妹仔feel，肉眼睇應該脹過佢老友鄭欣宜㖭，最後佢哋等咗10分鐘左右至上到車。
from:
http://hk.apple.nextmedia ... 131005/18450342
