九九年結婚嘅邱淑貞,轉眼做咗沈嘉偉太太十四年,兩公婆順利過渡兩屆「七年之癢」,絕對係圈中夫妻人辦!
生咗三個女,四十四歲邱淑貞keep得相當唔錯,樣同身形都冇乜走樣,望落一啲都唔似過咗四張。保養得好,又全心全意放喺屋企,二五同八珍講,沈嘉偉身邊班明星friend,好似郭富城、余文樂都當咗沈太係sample;唔願結婚嘅Aaron開始計劃成家立室,連近幾年慣咗「速食」嘅余文樂,都心甘情願俾Kary吳雨霏落焊,發展「樂雨戀」。
早個禮拜,《壹》仔喺銅鑼灣I.T旗艦店附近撞見沈太,一支公喺便利店買完嘢,再踩去隔籬買外賣粉麵。《壹》仔望吓個錶,都四點幾近五點,仲買咁多嘢食,十成九係沈老闆落區巡鋪要遲收工,頂住肚先。
生咗三個都唔走樣,邱淑貞食得清淡,魚蛋燒賣唔吼,𡁻饅頭。
戴住口罩嘅邱淑貞,見店員包好外賣,第一時間趷起身攞,十分心急。