曼聯05年來港時忠實fans李克勤向他們送禮，但禮物被發現遭球員留在更衣室，自此克勤被網友稱為「送禮勤」。今年7月曼聯再度訪港，前晚問克勤會否再送禮，他即稱自己是藝人，工作就是為他人帶來歡樂，更指一早料到禮物會被遺棄。
李克勤主持的無綫遊戲節目《決戰一分鐘》，前晚在將軍澳電視廣播城錄影特別版，請來好友譚詠麟（阿倫）及陳百祥（阿叻）率領兩隊藝員包括有朱千雪、岑杏賢、細細粒陳嘉佳、鬼妹陳明恩及蔚雨芯等比賽。
克勤多年來支持的曼聯球隊，今年7月再度訪港作賽，問到有否撲飛支持？克勤苦笑說：「一張都冇，不過何麗全（now高層）話會幫我搞掂。」05年曼聯曾來港，克勤送上貼滿自己靚仔相再寫着「Welcome to Hong Kong」的紀念品給曼聯，可惜最後球員沒拿走克勤的禮物，把它留在更衣室，自此網友稱呼克勤為「送禮勤」，日前克勤到中學宣傳時，亦慘被學生高呼「送禮勤」，令他一臉尷尬。問到克勤今次曼聯再來會否再送禮？他煞有介事說：「咁多年喇，大家開心就得，做藝人可以俾人講、令到人開心，我唔介意，預咗佢哋唔會攞走，呢個唔係我嘅問題。」
克勤主持的《決戰一分鐘》前晚請來朱千雪（左）及鬼妹陳明恩齊玩遊戲。05年曼聯來港作賽時，克勤送上充滿心思的禮物，最終卻被他們遺留在更衣室。
阿倫想搣細細粒
至於前晚錄影，細細粒和鬼妹皆是阿倫一隊，問他若兩人輸了怎算？阿倫笑稱：「肥妹咪搣面，我好鍾意搣人塊面，朋友啲小朋友我都咁做。」兒子小時有否搣他？阿倫笑說：「細個都有。」細細粒上陣玩搖頭和蔚雨芯對決，阿叻笑仍是處女的細細粒說：「你仲係女仔，唔好震到第二度。」玩到反晒眼的細細粒結果和對家打成平手，阿倫和細細粒即互相擁抱。
【今日我至暈】肥妹細細粒前晚喺克勤節目度見到阿倫，大家唔好以為佢見阿倫開心到暈，佢只係玩遊戲時搖頭搖到暈咋。
至於阿倫和阿叻玩「撞板乒乓」時，下體放上膠板將乒乓波頂入籃，阿倫寸阿叻說：「呢樣你好叻，唔好玩到甩褲。」阿叻則反擊：「唔及你。」
from:
http://hk.apple.nextmedia.com/entertainment/art/20130307/18186761
