患有胃癌並割胃的司馬燕目前正休養中，其夫吳忠義將於7月於荷蘭一座堡壘為她舉行一個結婚周年派對，當是補償當年兩人結婚未有舉行婚禮，令她自覺有如重生！
司馬燕希望舉行婚禮時肥啲靚啲。司馬燕與老公吳忠義一向恩愛，他決定7月為老婆在荷蘭搞古堡婚禮。
早前《好報》獨家踢爆司馬燕患胃癌並需接受割胃手術，現接受化療療程並在家休養。據悉，其夫趁太太病情好轉，今年7月於老家荷蘭為她舉行一個婚禮，本報記者昨日致電司馬燕，她承認確有其事：「唔係婚禮，係結婚周年派對。我同老公喺1996年結婚時，原本喺荷蘭book咗個堡壘，舉行盛大婚禮，但我媽媽咁啱嗰年過身，所以先唔大搞，改為返香港低調咁食餐飯，只係擺咗六圍。當年我哋都冇簽紙，係生咗細仔之後先喺美國拉斯維加斯註冊。」
「欠我一個wedding」
為何今年舉行這個結婚周年派對？司馬燕說：「老公好錫我，佢一直都好內疚，好似欠我一個wedding咁。咁啱7月佢有假，啲小朋友又放暑假，當係一個excuse都好，慶祝我哋結婚周年同埋我康復。」她大讚老公細心，她不用為派對操心，一切都安排妥當：「佢叫我乜都唔使諗，到時飛個人過去就得喇。」當日她不會穿婚紗，party將有逾百親友出席，包括好友吳麗珠、周美鳳及孫名翠等，到時會有DJ駐場及色士風演奏，其夫更會即場獻唱。司馬燕形容這個party就像她的reborn（重生），感覺很sweet。
對抗癌魔的司馬燕，家人的支持是最大的原動力。
血小板跌要宵禁
司馬燕透露目前體重約38公斤（83.6磅），希望到時可以肥些漂亮些！昨日司馬燕原要進行第五次化療，但要延期，她說：「因為我曳，農曆新年期間成日出街，令到血小板好低，曾經跌到得17，依家去到52，但仲未合格，所以醫生話要延遲化療。老公下咗宵禁令，夜晚11點後唔畀我上網同埋用手機，要我好好休息。」
from:
http://orientaldaily.on.c ... /00282_010.html
