黃秋生主演嘅《葉問—終極一戰》喺下月底上映，秋生特登減磅嚟做好葉問呢個角色，近日睇過預告片嘅人都有同一個感覺：點解秋生呢個葉問，講嘢把聲咁似佢聲演麥兜故事個校長嘅？究竟佢係咪想拍葉問搞笑版呀？
有人話曾志偉（左）同黃秋生對打時，志偉嘅身手仲好過梁朝偉，大家點睇呢？秋生話佢聲演麥兜故事裏面嘅校長係有潮州口音，同葉問唔同㗎！
琛哥鬥黃Sir
噚日秋生接受電話訪問時話佢啲佛山口音，係做過晒資料搜集，唔係亂咁加㗎，佢話：「做毛澤東就要講湖南話，唔會講英文，就係咁簡單，唔介意人哋話似校長，佢哋唔識啫，麥兜個校長講嘅係潮州口音。有兩隻眼嘅，你就即係佢佢就即係你咩。」秋生話唔相信觀眾會當笑片睇，就算開頭未知做乜會笑，到完場會喊，咁就覺得自己好犀利。
秋生喺戲中同志偉對打，有網友笑言《無間道》中嘅琛哥同黃Sir終於交手，仲有人讚龍虎武師出身嘅志偉打得好睇過梁朝偉㖭。
馮仁昭噚日都同葉問長子葉準傾過電話，葉師傅話葉問的確有口音：「我阿爸講嘢好重佛山口音，當日秋生嚟過問我資料，我提供咗阿爸啲生活習慣畀佢。」
對於秋生嘅演出，葉準話未睇部戲，唔落評語會公道啲。
from:
http://hk.apple.nextmedia ... 130228/18179007
