由身材到口才都一樣咁惹火嘅甄妮，周一（18日）終於開show！之前佢同細路女阿G.E.M.隔空開火，又被指演唱會票房輸俾「廟街歌后」朱咪咪。咁依家條氣順番未呢？甄妮姐姐喺台上就咁話：「我有好多經典嘅歌，唔學似人哋無歌就唱人哋啲歌。唔係咁好囉！話晒係自己嘅演唱會。」咦，意有所指咁喎。
不過，甄妮姐姐唔係成日咁好火嘅，尤其提到阿女甄家平（Melody）就最冧。佢喺台上狂讚Melody不特止，仲特別安排25歲嘅佢做今次個show嘅導演，坐正控制台中間㗎。
今年60歲嘅甄妮話自己犯太歲，叫觀眾俾多啲利是佢沖喜。你咁搏，實得嘅！
介紹合唱嘉賓張敬軒出場又話：「我哋呢個年紀，都可以聽後生嘅意見㗎。但點都好，最緊要有禮貌！呢個後生仔就好有禮貌嘞！」
Melody成晚坐喺控制台睇住阿媽做騷，而早前甄妮仲欽點阿女幫佢設計一款賀生辰billboard（由演唱會主辦單位俾錢）放喺紅隧口。搞咁多嘢，都係為咗幫阿女攞多幾個credit囉！
