蛇年嘆世界，李克勤星洲着衫游水

有心唔怕遲，十月都係拜年時。新年流流，先祝大家蛇年行好運。假期食飽玩夠嘅打工仔，今個禮拜開始又要返工捱騾仔，邊似得一班藝人，隨時放假嘆世界，仲要避開晒最人多嗰幾日，初四、初五先出發。好似阿B鍾鎮濤一家就去咗法國滑雪避年；李克勤就身處新加坡最高、最貴嘅酒店曬太陽，爽爆。不過為免豬腩肉曝光，克勤竟然着埋衫戴晒帽同黑超游水，認真騎呢！

李克勤寓工作於娛樂，初三赤口出發到新加坡為當地春晚演出。趁有空檔，除咗玩摩天輪，仲潮拜埋星洲最豪嘅Marina Bay Sands酒店57樓無邊際泳池！不過咁，乜落水俾着衫㗎咩？有啲似強國人feel喎！

薛凱琪　澳洲曬日光

初七晚為新碟錄完最後一首歌嘅薛凱琪，趕搭夜機飛澳洲悉尼過火辣辣假期。佢一到埗就即刻嘆番個海邊下午茶，又睇咗當地煙花，真享受。


嘆完茶，阿Fi仲去埋當地著名嘅Bondi beach曬日光浴兼睇煙花，咦！唔知佢有冇三點式呢？

王馨平　酒莊嘆靚酒

好識享受生活嘅Linda王馨平，214情人節出發到法國南部，先去打golf，再去埋酒莊嘆靚紅、白酒，完全係富豪級享受。

阿B豪遊法國

阿B鍾鎮濤呢個廿四孝爸爸，無論去邊都帶住一家大細。年初三就帶埋老婆范姜、三個囡囡出發豪遊法國，首站上著名阿爾卑斯山區嘅雪山Vald Tsere滑雪，之後仲去埋巴黎羅浮宮。咁疏肝，似乎B哥哥舊年賺好多喎！