甄妮前晚在紅館舉行尾場演唱會，吸引到前特首夫人董趙洪娉及現任特首夫人唐青儀結伴捧場，但兩人未睇足全場就離去。而60歲牛一的甄妮更自言生日願望是環遊世界、搵個好伴侶結婚及再生兩個仔，但事後她又反口不認數。
前晚是甄妮60歲牛一，亦是其個唱的尾場，當晚有過萬觀眾陪她慶祝大壽，更吸引了兩任特首夫人捧場，董建華的太太董趙洪娉及梁振英的太太唐青儀前晚並排而坐欣賞個唱，梁太睇得十分開心，反而董太就木無表情，兩人未睇足全場就即閃人，並在後台與甄妮合照。
甄妮完成個唱後暫時不會再在香港舉行演唱會，所以她前晚相當感觸，兩度落淚，完場後她舉行簽名會，並與前夫傅聲的胞兄Haywood Cheung擁抱。之後甄妮出席慶功宴在台上自爆有三個生日願望，分別是環遊世界、搵個好伴侶結婚及再生兩個仔。
前晚是甄妮60歲的牛一，過萬觀眾即場與她慶祝，令她十分感動。甄妮連開三場個唱竟然零喘氣，前晚佢仲着上超性感嘅歌衫，大騷事業線，果然寶刀未老。
甄妮（左）和愛女Melody母女情深，完成個唱後兩母女更興奮相擁。兩任特首夫人董趙洪娉（右）和唐青儀（左）前晚結伴欣賞甄妮個唱。
「囡囡逼我拍拖」
事後甄妮接受記者訪問卻又貫徹講完唔認數的性格，指三個願望都是假願望，她說：「60歲只得一次，有萬幾人慶祝，好滿足，三個都係假，都冇人娶我，寫到我咁惡，拍拖幾時都可以，搵個roommate，絕對要過囡囡嗰關，佢成日都逼我拍拖，但冇人追。」
對於個唱中講巨肺小肺論，被指是暗寸G.E.M.同林欣彤，她說：「我冇指任何人，唔想再講無中生有嘅事。我會叫任何一個人都要加油，特別係年輕朋友，要學更多知識同修養。」她表示將與女兒回紐約休息，始終已60歲，內裏機件都好攰。
問到在個唱中獻唱《再度孤獨Love is over》是否獻給傅聲時，甄妮說：「首歌係林振強寫，聲仔唔喺度，林振強都唔喺度，當年係寫我思念聲仔，30年嘞仲有乜好想，死都已經死咗，活就要好好行落去。」
from:
http://hk.apple.nextmedia ... 130222/18172706
