嗌生嗌死，嚇到身邊朋友同fans面青嘅關淑怡，終於正常番！為咗下個月兩場紅館個唱，破格做足宣傳，又落足心機做籌備，再冇話失驚無神唔見咗人。
唔再鬧情緒，但對於早排做《勁歌頒獎禮》嘉賓，俾人笑佢有大肚腩，Shirley上個禮拜同八個壯男排舞時，就捉住《壹》仔平反。
「我呢啲唔係腩肉，係識唱歌嘅人，用丹田提氣時嘅現象。」為證明佢冇講花話，Shirley仲即場示範一次，證明自己有胸冇腩。
花時間排舞練歌，二五話Shirley想再fit啲，隔日先有米落肚，其他時間，食木瓜當飯。仲有，每朝起身，佢都會飲一碗要五千蚊一両嘅參茶。
跟足一切常規做，關淑怡想重新開始，呢鋪應該係的起心肝，嚟真！
4吋深坑~排舞期間，關淑怡露腰晒胸，行動證明係冇豬腩肉。
俄男伴舞
騎膊任托~壯男伴舞，其中三人來自俄羅斯，關淑怡任舞男托胸做一字馬。
做《勁歌》嘉賓，關淑怡唱歌現腩，事後佢解釋係因為用丹田提氣嘅正常現象。（《蘋果日報》圖片）
