現年49歲的人母關淑怡（Shirley），前晚假紅館舉行入行25週年個唱波折重重，開場前因飲了大煲黃酒煮雞，搞到唞不到氣幾乎叫救護車，憶起亡母不能再看她的演唱會，在台上激動爆喊，安哥時著5吋高踭鞋登場，又不慎當眾僕低慘變撻生魚，Shirley踢掉高踭鞋赤腳演唱，要勞煩嘉賓譚詠麟（阿倫）幫她挽鞋打氣。
九十年代憑《難得有情人》唱紅的關淑怡，前晚假紅館舉行「The Best of Shirley Kwan25演唱會」，卻遲了41分鐘開騷被噓。昨日工作人員解釋Shirley因食了黃酒煮雞「出事」：「佢飲曬湯，因為平時少飲酒，飲完後喺酒店房唞唔到氣，差啲叫十字車，5點幾去到紅館頂住綵排，要幫佢扣喉嘔番出嚟先好啲。」怎知Shirley在台上不慎仆倒，導致腰和腳都受傷。
執生瞓地擺甫士
事緣當時Shirley腳踏5吋高踭鞋邊唱邊與觀眾握手，竟不慎跣倒打側跌在台邊，慘變撻生魚的她大叫：「哎呀！」幸臨危不亂瞓地執生擺甫士，更踢走高踭鞋說：「I don't need shoes.」嘉賓譚詠麟挽鞋登場，並對她說：「著番對鞋先啦，我知道聽日C1頭條就係阿倫同你挽鞋。大家見佢今日狀態，佢係唔應該開埠以嚟第一晚就係最後一晚，今日冇嚟睇嘅係笨……唔講得。」Shirley感動到想喊，阿倫續說：「聽聞你唱完之後移民，都唔知你點解咁諗，係咪dry呀？好心你啦，識多個啦，唔同宗教都得箒，唔使踩住波車嚟（因傳聞Shirley兒子的爸爸是寧波車）。」Shirley說：「唔係呢。」阿倫再攞經手人是曾志偉的傳聞笑說：「哎，咁我信志偉啦，佢成日都話佢嘅。睇佢DNA都唔係，我覺得應該係似我囉，哈！」全場爆笑。
Shirley還請了吳業坤和周慧敏做嘉賓，她唱到《人生可有知己》時哭了，周慧敏出場說：「你搞到我都想喊。」之後Shirley在台上憶亡母又爆喊：「希望呢個25週年送畀我媽咪，以前佢每次都嚟睇我，以後冇咁嘅機會。當我面對死亡咁近嘅時候，我諗起媽咪同我講『淑怡，你嘅talent係我畀你嘅gift，我唔希望你浪費。』令我面對不利新聞時都可以撐得過。」
Shirley穿5吋高踭鞋出場，之後走到台邊與觀眾握手。
Shirley撻低後，即執生擺甫士。
赤腳唱歌的Shirley，要阿倫挽鞋上台。
鄭融被男舞蹈員抱起時，疑遭對方掂到胸部。
鄭融否認被揸胸
台上Shirley與舞蹈員跳貼身舞，換衫時有赤膊外籍男舞蹈員請鄭融上台跳辣身舞，鄭融擘髀騎在他的大腿上，男舞蹈員在上面狂un，之後抱起鄭融轉圈時，左手疑似揸落鄭融的右胸。
完騷後Shirley受訪提起亡母說：「父母之恩冇辦法報答，媽咪成日話『人生不嬲都係甘苦，甜酸苦辣乜都有，唔好放棄好好珍惜。』無論遇到乜嘢事，香港人都要keep going。」問是否暫別樂壇？她說：「Maybe，maybe not，不過唱歌真係抒發咗好多，總之觀眾開心就得，你哋成日覺得我無定向風，做嚇停嚇，我都唔想嘅。」
而鄭融昨在電話否認被揸胸：「梗係冇掂到啦，抱起一個人，手一定擺肋骨，我諗角度問題，唔使擔心，佢哋好專業。」
採訪：盧妹
攝影：仇志德
from:
http://hk.apple.nextmedia ... 160425/19584572
