藝人的日常生活經常被傳媒追訪，雖然關淑怡（Shirley）的私生活話題性十足，不過她堅持守護屬於自己的私密空間。面對種種揣測和傳言，Shirley寧願封口亦不作太多澄清，因深明這正是娛樂圈的生態！
關淑怡希望專注做好音樂。
Shirley一向對私人事三緘其口，雖然她曾先後在社交網站上的私人帳號發表心聲，包括洩露有尋死的念頭、兒子關浚賢的生父為不丹寧波車，及怒轟得不到基本尊重，要告別唱歌事業等等，但當她的私人生活得到傳媒、大眾的關注，Shirley亦一如既往選擇封口不提。
「大家唔好咁蠢」
「唔講，我諗我都係concentrate（集中）喺音樂上嘅嘢，真係覺得啲人太多嘢講喇，夠喇，我唔會解釋，you know，我覺得夠喇，要到此為止！平時嘅生活係我嘅私人生活，就keep it that way（保持原來模式）！」
一向低調的關淑怡不想多談私事。
關淑怡（左起）、王憓及顧芮寧中、西樂交融結合演出。
關淑怡（左）與顧芮寧第一次合作交手。
關淑怡曾與內地男主持李佳念拖手，但已成過去。
上年Shirley曾高調與內地男主持李佳念拖手出席活動，舉止親熱，令人一度以為她的感情生活有着落，不過她就否認對方是男朋友，更坦言現時感情生活一片空白。
「係空白！上年嘅係上年嘅事，根本就冇件咁嘅事，所以一路都係傳嘅、講嘅，但係you know，呢啲係呢一行嘅特色吖嘛，大家唔好咁蠢吖，人哋講就一定係。唔係我拖（佢）嘅，咁嗰陣時我真係有病，從來都冇任何其他嘢發生，佢見到我咁，係男仔都會扶一扶啦，係風度嚟(架)嘛！空白，唔講。」
工作方面，Shirley近年不太活躍於香港樂壇，雖然之前有傳她有意舉行入行30周年演唱會，但她澄清一切只是傳聞，更坦言自己一直在工作上非常被動，全靠身邊的人為她安排。
「工作冇諗咁遠」
「我邊有say，係傳囉！大家都知我不嬲都係交畀我身邊嘅人幫我搞，好少自己會有啲咩idea。（出碟？）我都冇諗得咁遠、咁詳細，呢啲隨緣、隨心啦！」
Shirley在工作上「貴精不貴多」，本月27日她將聯同「二胡王子」王憓及新進歌手顧芮寧（Elaine），參與《感覺‧國樂》中西薈萃音樂國度的演出，中、西樂交融結合的主題正正是最能打動她支持是次演出的地方，她更透露屆時會選較冷門的歌曲獻唱。
中西樂crossover
「參加呢個騷最主要因素係我真係未試過中、西樂一齊嘅live演出，都有期待！同埋我揀嘅歌係會揀比較少喺concert唱嘅，真係未試過，我覺得可以喺呢個live show試吓，會揀一啲啱呢個concept嘅歌，我不嬲唱開嗰啲都係好商業化嘅歌，但其實都有啲歌唔係太商業化嘅，今次嘅比例係會多少少！同埋今次呢件事係以音樂為出發點，我近呢十年好少做呢啲，我都唔知依家嘅感覺係點，但都應該幾得意嘅！」
喜歡提攜樂壇後輩的Shirley，這次音樂會就點名力薦Elaine共同演出，更會與彈琵琶達國家級水準的Elaine crossover演繹《繾綣星光下》。
「據我所知音樂造詣上Elaine就真係好犀利，我哋彼此都認識，但就未試過真係一齊去玩隻音樂，音樂上面我哋未交過手，所以我都想試吓！我又冇特別規限自己要同咩人合作，我覺得如果大家有common ground（共同點）嘅都可以試吓！」
後記：守護私密
Shirley一向予人氣場強大及難以親近的感覺，不過小記覺得她只是有個性，只要是她認為不需要向大家交代的私人事，就一定不會公開來講。說到底，她只是希望專注做好音樂，守護自己應有的私人空間！
Make-up：Wendy S.Lee @ Wendy's Workshop
Hair：Calvin Chan @ Mi Salon
Venue：Eighteen Sharp
From:
http://orientaldaily.on.c ... /00282_032.html
