TVB契仔李克勤，近年受四大唱片公司合約影響，錢途大大削減，唱片聲勢亦不復當年勇，年尾頒獎禮捧蛋而回，連豬肉獎都分唔到。早前雖然有殼王（陳國強）照，克勤借《決戰一分鐘》破冰重現TVB，節目收視高開30點（約195萬觀眾），可惜後勁不繼，收視逐步回落至23點（約150萬觀眾）。
禍不單行！上周六（12日）克勤在大陸巡迴──上海個唱，入座率僅得三成，主辦商蝕到入肉。形勢嚴峻，克勤惟有諗噱頭自救，為谷人氣本周四（17日）克勤會親到中學為《決戰》做騷宣傳。
《決戰一分鐘》最初請來梁嘉婉等校花參賽，被網民指節目靠校花玩騎呢谷收視，可惜收視依然每況愈下。
去年李克勤以三百萬薪酬，為now出任歐洲國家盃主持，做咗足足一個月，算是去年大project。
入行26年的李克勤，兩年前在香港舉行「港樂」個唱贏盡口碑及票房，可惜上周六（12日）首次在上海奔馳文化中心舉行的首站巡迴騷──「李克勤演奏廳演唱會」，入座率卻只有三成。
這個場之前張學友、Lady GaGa及Elton John等國際巨星都開過騷。今次克勤個唱由六個主辦單位合辦，當局一次過簽咗克勤6場，每場投資三百萬人仔。2010年克勤與阿倫在內地舉行的「左麟右李」巡迴演唱會叫好叫座，所以今次主辦當局最初對克勤都好有信心，至搵呢個坐兩萬人嘅場搞騷。可惜，上海呢站銷情慘淡，主辦商蝕到入肉。
「呢個場淨係場租都要80萬人仔，今次得嗰6千個入座率。場面咁冷清，工作人員都唔敢同克勤講，克勤出場睇見啲吉位都O晒嘴。克勤收100萬歌酬雖然袋袋平安，但主辦當局點計都要蝕幾十萬，之後仲有兩場未唱，現在主辦商都頭痕緊！」知情者說。
大陸巡迴觸礁，本來打算強攻大陸市場的克勤，惟有將焦點放番香港市場。去年在殼王陳國強好友曾志偉拉線之下，克勤終於再返TVB主持《決戰一分鐘》，起碼叫做有番曝光率。《決》首播時有成30點收視，可惜近日回落至23點。克勤見個勢愈來愈弱，主動要求TVB搞多啲宣傳谷收視。
上海直擊 開場廿分鐘3成入座
上海個唱門券售價由380至880蚊人仔，開場廿分鐘，場內仍有7成吉位。而當晚克勤唱至末段，位於五樓的觀眾席更因臨時電纜故障引起小型火警，克勤都算禍不單行。
全個騷樂隊最貴，音樂總監趙曾熹收30萬，但冇管弦樂，現場亦唔見星級樂手。
當晚的dancers剛剛一打，但快歌不多，克勤的舞技大家心照。
拒提早做「明星版」
上海個唱樂隊卡士麻麻，相比過往克勤連錄音都要著名live band，仲要book間學校嘅hall嚟錄音，今次似乎求其咗。
「TVB提議做商場版及明星版，但克勤唔想咁快邀請藝人上節目，怕被人搶風頭，話節目臨完結前至做明星版。至於搞商場騷，因TVB會向商場收贊助費，但TVB同四大仲有金錢爭拗，克勤為免所屬環球唱片公司尷尬，決定只做校園騷，搵咗好耐至有學校肯做。」
在TVB高層出動人情牌之下，決定於周四（17日）在馬鞍山屬band one的德信中學舉行校園騷。預計當日下午待學生下課後，克勤便與他們一起試玩《決戰一分鐘》的遊戲，讓傳媒報道以谷宣傳。
周二（15日）問到克勤搞校園版是否想谷收視，他說：「我會盡量參與。（點解搞校園版，唔搞明星版？）我唔知，你問番監製。（上海個唱得三成入座率？）冇咁誇張。（我哋有相為證喎。）上海站係冇其他站咁理想，呢個係事實。巡迴做咁多站，總有啲好，有啲唔好。上海我諗有六、七成入座率。（有冇擔心影響埋其他內地個唱？）冇得驚！」而其經理人公司藝能製作總經理Ronny則說：「克勤共簽6場大陸個唱，上海第四站，之前廣州、昆明、南寧三場有十成入座率，而上海嗰場係差啲，因為個唱中途火警，令一些觀眾離開引致。」但其實火警是差不多完場才發生的。
至於校園騷方面，本刊致電校方，發言人許先生表示：「校方都係想俾同學多啲認識新事物。（邊個聯絡你哋？）你問番TVB啦！」
跨界保人氣
受唱片合約影響，李克勤2012年仍然未能在TVB唱歌，故他轉戰其他頻道，商台及now便是他的落腳點。今年他計劃搞餐廳，多元化發展。雖然大陸個唱失利，但依然錢途無限。
唱片
廣東碟《在森林和原野》●分紅每張$15 $24萬
國語碟《似曾相識》●分紅每張$12 $72萬
《叱咤903李克勤在森林和原野笑笑音樂會》
音樂會
澳門演唱會 80萬
廣州演唱會 100萬
《叱咤903李克勤在森林和原野笑笑音樂會》 30萬
《芒果群星芒come音樂會》 30萬
生意
「左麟右李粥麵小炒專門店茶餐廳」（未回本）
主持
TVB主持奧運 40萬
now主持歐洲國家盃 300萬
登台
30次/40萬 1,200萬
總數：1,876萬
