電視大戰打埋身，一向用人唯親的無綫，最近亦要轉靠中生、中旦外援孭飛打仗。繼46歲周海媚回巢後，48歲關詠荷近日亦出山，與無綫福將歐陽震華拍攝30集重頭劇《情逆三世緣》。
可是，本刊收到消息，這對曾合作《陀槍師姐》、《醉打金枝》的最佳拍檔，近日在片場幾乎零交流。據知，心急趕返屋企湊女的關詠荷，私底下對住嬉皮笑臉的「NG王」歐陽震華極度不滿，更多次當面寸他態度唔認真，連累劇組遲收工。忍無可忍的她，日前對着本刊記者狂轟歐陽震華說：「佢下下NG十幾次，咁多年都冇變過！」娥姐（關詠荷）發火，非同小可。
娥姐怒啤~歐陽震華老貓燒鬚，連兩三句簡單對白都NG8、9次。關詠荷和黃智賢在旁等候，前者更不耐煩狠啤他
主動耍冧~雖然得幾句對白，但歐陽震華講極都錯，連他亦唔好意思，主動向其他演員講對唔住，不過身旁關詠荷冇反應。
09年，關詠荷拍罷《五味人生》後，決定收山湊女。直至去年10月，經無綫高層樂易玲游說，兼夾男主角歐陽震華向死黨張家輝「攞人」，關詠荷才答允以每集5萬蚊，復出拍攝新劇《情逆三世緣》，與收舊價4萬蚊一集的歐陽震華續前緣。關詠荷曾坦言知道對手是歐陽震華才肯合作。
據知關詠荷今次回巢要求多多，不接親熱戲及咀戲，拍落水戲要用替身，劇本亦要一早出定。她更限定每日只接一組戲，最後劇組亦一一應承。但估唔到最難搞是她的拍檔歐陽震華，不時爆肚又經常NG，打亂她收工時間。
黑面回應~對於老拍檔狂NG，上周四（10日）關詠荷面燶燶對記者說：「NG個個都有啦，不過佢下下NG十幾次之嘛。」擺明唔妥
錫寶貝女~關詠荷一向錫晒愛女Brittany，縱使出山拍劇，亦要劇組遷就她放工時間，Bobby狂NG阻收工，又難怪娥姐咁㷫。
寸頭髮少
據知歐陽震華記對白一向麻麻，試過遇到繞口對白NG十多次，幕後見慣不怪，只有關詠荷出面頂撞。一幕後人員說：「有次娥姐黑晒面出聲窒佢：『你十幾年都冇進步過，有冇理吓我哋感受㗎，咪亂咁將啲字塞落去就當講咗啦！』嗰陣Bobby以為佢呻吓，當冇事發生繼續拍。」誰知事隔數天，關詠荷竟向傳媒說：「佢同以前一樣咁多NG，隨便講四個字塞番啲位就當係。」堂堂男主角竟然俾對手窒NG多，歐陽震華私底下曾埋怨關詠荷口沒遮攔，但女方堅持自己實話實說。
幕後人員續說：「有次Bobby整頭搞咗好耐，娥姐行過大大聲講咗句：『我同你差唔多時間返嚟，你頭髮得幾條，點解仲搞得耐過我？』Bobby即刻黑晒面。」幕前幕後個個都知頭髮少一直是歐陽震華的禁忌，自此，Bobby和關詠荷同場除了對稿外，近乎零交流。
外景當日新界氣溫得10度，嘆慣的關詠荷亦做足準備，趁未roll機時着番件羽絨。她仍不時流鼻水，要用紙巾捲成筒狀塞入鼻窿吸鼻水
紙巾循環再用後，關詠荷未有立即棄掉，反而放入戲服的腰帶中，似乎唔多符合衞生喎！
拍劇諸多規矩的關詠荷，其實除Bobby外，與其他台前幕後亦少有傾談。日前，她返無綫化妝等入廠，在化妝間的一小時內，就只與髮型師閒話家常了幾句
關詠荷在晚膳時間，甚少與其他演員到飯堂食飯。記者觀察數日，只見每到放飯時，其助手都會到公司餐廳，買外賣送到化妝間。
句句有骨
日前，二人在沙頭角拍攝一場文戲，其間歐陽震華只需講幾句打油詩便可收工。「可以同霜霜姑娘行吓山，釣到泥鰍都當老鼠斑……得閒散吓步，清明都唔使去掃墓。」但幾句對白竟然NG了9次之多，起初他以笑遮醜。最後講講吓，歐陽震華仲錯講成「得閒掃吓墓」，連他自己都不好意思說：「對唔住再嚟過。」而原先企在他旁邊的關詠荷，怒啤了他一眼後，索性着番件羽絨上身，企開一邊等他。
上周四（10日），本刊就歐陽震華NG頻頻一事求證關詠荷。她一臉嚴肅地說：「NG個個都有啦，不過佢下下NG十幾次之嘛，咁多年都冇變過。冇Bobby嗰兩日，我哋個個拍戲都好認真，有佢喺度咪當調劑囉，NG搞笑吓𠱁吓我哋開心。（見到你哋冇偈傾喎？）日日對住，對得多都悶啦，仲邊有咁多嘢講！」曲線寸爆老拍檔，關詠荷火氣十級猛。至於歐陽震華，本刊多次聯絡他，但至截稿前仍未回覆。
