在Google搜尋器輸入「歐陽震華」四字，隨即連「關詠荷」亦自動彈出，可見歐陽震華（Bobby）與關詠荷（Esther）的最佳拍檔形象非常深入民心。觀眾望穿秋水，等足十二年，最近終可看到兩人合作劇集《情逆三世緣》，觀眾睇得開心，晚晚黐住電視機笑不停。歐陽震華坦言為氹關詠荷出山拍劇，落足嘴頭穿針引線，事前先徵求關詠荷老公張家輝同意，更向家輝發毒誓保證冇咀戲。
歐陽震華與關詠荷均認為好拍檔難求，就算十二年沒合作亦絕不影響默契。
合作無間唔怕緋聞
關：十二年之後再同你拍《情逆三世緣》，感覺同以前都冇乜分別，都係嘻嘻哈哈拍就拍完套戲
歐陽：有好多人都唔做，有啲又拍拖唔拍劇，或者拍拖唔拍戲。咁好難得我哋十幾年前已經係最佳拍檔，仲攞埋獎添。
關：拍《醉打金枝》攞嘅「最佳惹笑冤家大獎」吖嘛！但係個獎我哋攞完之後已經冇咗。
歐陽：嗰陣係第一套同佢你拍《醉打金枝》，冇依家咁熟，但係都好容易溝通到，拍第一套劇就攞獎喇。
關：嗰陣冇乜呢啲拍檔啫。咁同Bobby拍劇係舒服嘅，唔使避忌，又唔會傳緋聞。
歐陽：我已經發晒毒誓，同家輝講唔會有咀戲o架！哈哈哈。
關：我哋做情侶唔使拍親熱戲，一路都冇呢啲。
外表文靜的關詠荷講笑話有一手，氹得歐陽震華笑逐顏開。
歐陽震華笑言要經張家輝同意，才敢叫關詠荷出山。
只要有好劇本，關詠荷不諱言再拍劇。
歐陽震華叫關詠荷將「銀馬獎」拿回家送給張家輝。
歐陽：呢啲留番畀啲後生啦。我哋古裝冇，《陀槍師姐》都冇，係得《美味天王》有，不過係搞往笑咁咀，一路咀仲要一路講對白。
關：嗰場係超誇張、超搞笑，所謂嘅親熱戲都係搞笑行先，唔使拳拳到肉嘅。
各有家室親熱免問
歐陽：其實我好抗拒拍咀戲，因為我啲輪廓唔靚，家輝拍咀戲咪好睇囉！鼻又高面又瘦。我就鼻又扁面又闊，好似咀落個鹹煎餅咁，哈哈。
關：唔需用呢樣嘢去吸引觀眾囉。
歐陽：大家始終結咗婚，觀眾睇我哋拍咀戲可能會覺得好奇怪，唔會好受落。觀眾又知道我哋咁熟，寧願用表情、行動去表達，唔一定要咀先有嗰種感覺嘅。啲師奶觀眾會話：「你都結咗婚啦！仲拍呢啲戲！」咀戲其實係好難拍o架！點到即止不如用其他方法表達。好似《陀槍Ⅲ》劇本話要同蔡少芬激吻，我就話不如錫吓額頭、錫吓面就算囉，蔡少芬都話好。唔係一定要錫嘅，要睇你喺觀眾心目中嘅形象，我哋呢啲偶像實力派，唔係獨孤一味嘅。
關：咁你喺TVB咀過邊個？
歐陽：姚瑩瑩、蓋鳴暉就人工呼吸，蒙嘉慧就犀利咯！嗰場戲夜晚喺酒吧附近拍，好多人睇住，好緊張。我好驚拍呢啲戲，喺度又飲水、又食香口膠，嗰陣蒙嘉慧都未拍拖，佢問我：「好緊張呀？又飲水、又食香口膠。」我話咁多人睇住點咀得落！佢就問我使唔使試吓，到正式拍會定啲。我就話都好喎，咁就連埋機器先試一次。好激o架嗰場戲，錫到黐埋牆碌嚟碌去，試完又真係冇咁驚喎！冇諗歪路嘅。咁同你拍嗰啲就冇咁開放，好含蓄嘅。
一動一靜互補長短
歐陽：今次你出山拍《情逆三世緣》我只係推波助瀾，你都有戲癮嘅。
關：咁你都係一個重要嘅籌碼。
歐陽：我好尊重家輝o架，問你之前都問咗家輝先。
關：咁同一個可以唔使溝通、又可以好容易溝通嘅對手就一定好放心。基本上冇乜問題，但係咁都要睇劇本嘅。
歐陽：咁耐先拍一套，梗係天時、地利、人和，拍又要拍得Enjoy啦！所以佢每日開工都好靜心咁坐喺度。蔣志光都有話點解你頂得順Esther呢？
關：唔係喎！嗰日車蔣志光佢話點解你頂得順Bobby嘅？
歐陽：乜我好難頂咩？蔣志光話係我先氹到你笑。
關：我唔講嘢啫。
歐陽：你就算講嘢都好短嘅！係、哦、唔，哈哈哈。
關：係你先可以不停咁講嘢，笑話又講，是非又講，乜都講一餐。有時又寸吓人，有時好好笑，有時就被你激親。
歐陽：朋友之間係要講多啲嘢。
關：我信得過啫，聽完唔會周圍同人講。其實幾懷念拍戲嘅生活，成班人嘻嘻哈哈，又好認真去拍劇。演戲係好玩嘅，但係演戲以外要等就唔好玩喇。今次就盡量連等嘅時間都去享受，可能冇乜機會再等呢。
歐陽：係等我嗰十幾日啫（Bobby年初急性肺炎入ICU）。
關：以前都冇乜戲個主角係咁，哈哈！當時好擔心，去到醫院見你喺度偷偷哋食海南雞飯，又喺度不停咁講嘢就知佢冇事。之後你開工都好檢點嘅，一開番工就好似以前咁喇。
歐陽：係呀，不停咁NG吖嘛！啲Camera Man都話我保持到水準，哈哈。
關：同佢拍《醉打金枝》都已經成日NG。
歐陽：NG係正常，人唔係影印機。
關：你係想加啲嘢落對白度啫。
歐陽：你唔係話我出院之後把口衰過以前咩？
關：咁先證明你冇事，好過你戇居居咁仲驚呀！
搞笑互窒無損感情
關：其實今次《情逆三世緣》做三個角色其實都幾痛苦，要將人生最高峰嘅時間濃縮咗喺十幾集裏面，生死起伏都好攰架！
歐陽：我同朋友講你喊嗰啲位喊得好靚，未見過女演員喊個樣眼裏面有咁多嘢。
關：去到後期場場都喊咁滯啦！
歐陽：睇番你捉住我隻手想叫醒我嗰場戲，我真係瞓着咗，哈哈哈。
關：你瞓咗唔緊要，但係你瞓到有鼻鼾呢，幾乎嘈住我講對白。
歐陽：仲想唔想拍劇？可以拍軟性啲警匪片題材，唔一定要拍我嘅，你仲有好多選擇。
關：睇劇本啦，咁拍住你我就一定會瘦啲。
歐陽：我嘅職責係令你開工愉快又開朗，哈哈。
視后變侍候
性格文靜的Esther平日比較少說話，但Bobby總有方法令她發笑。例如影相時，Bobby見餐廳有一座銀馬擺設，即捧起送給Esther：「家輝金馬獎就攞過喇，攞埋呢個銀馬獎返去啦！」引得Esther開懷大笑。
提到今年無綫台慶頒獎典禮公投「視后」，Esther亦被Bobby的幽默感染笑說：「我已經係『視后』啦，喺屋企又要『侍候』個女、又要『侍候』老公。」引得大家笑不停。好朋友互補長短，加起來才是「最佳拍檔」。
筆錄：影視組
From:
http://orientaldaily.on.c ... /00282_055.html
