近日興數臭周星馳，可能同佢就嚟有戲上有關啦。先有導演王晶鬧有人損人利己，繼而俾舊夥記田啟文（田雞）話佢冇人情味又冇朋友。同周星馳合作過幾部片嘅導演李力持，日前做now節目《娛樂審死官》嘉賓時都嚟抽水，主持人梁思浩由亞視開班教藝人轉到問「周星馳有冇資格做導師」時，李力持話：「都有資格啩，人哋大導演最叻叫人抄囉。咁演戲就係模仿開始，似BB班啲小朋友鍾意學大人講嘢或者模仿動作，扮扮吓就係啦。」
梁思浩（左）講到星爺有冇資格做導師，李力持就話佢最叻叫人抄，星爺執導《西游．降魔篇》，女主角舒淇同文章咀戲曝光。劇照
星爺鍾意食老本
李力持仲話近年已好少搵去咗炒樓嘅周星馳：「星仔，係星爺至啱，佢喺天花板嗰度呀，好高聽唔到我。」充滿意象嚟話星爺高高在上。
此外，星爺執導嘅電影《西遊．降魔篇》安排喺農曆新年上映，星爺着晒西裝成個大師咁接受內地記者訪問。佢被記者問到近日俾舊拍檔數臭一事，佢話：「不會故意去看，但會看到。」佢話只可以當冇事，因為冇嘢可以做。講到拍《西遊記》被指係食老本，佢話：「我是喜歡原創的，而且《西遊》有本身價值，不是因我要吃老本。」
From:
http://hk.apple.nextmedia.com/entertainment/art/20130118/18138020
