王征不理公憤，繼續強制亞視藝人上洗腦班，企硬唔上堂的有從未蒲過頭的亞姐冠軍馮雪冰；原來早於亞視未開班前，她已經第一個造反拒接陪客小姐通告，並決定提早離開亞視。
不過，亦有人妥協而變為王征愛將，包括被封「四大寵男」的亢帥克、古卓文、楊正軍、黃文韜，經常被點燈出埠見客賺錢。
拒做陪客
當選亞姐冠軍後，馮雪冰經常要隨傳隨到，又唱又跳，陪飲陪食，接待王征的內地富豪朋友。「人哋選亞姐係諗住入行做藝人，依家冇嘢做不特止，仲搞到好似做夜總會咁。未開洗腦班前，馮雪冰已經返公司嘈過，話唔再出席呢種活動，之後就冇再接通告。」亞視內部人員透露。
據知，馮雪冰已向亞視請假到今年三月合約結束，未卸任亞姐，已提早唔玩，所以亞視要求藝員返洗腦班，她更加冇有怕，企硬唔返學。
對此，馮雪冰直認不諱。「之前嗰啲活動，我以為係工作，所以一直有出席，但後來發現係陪贊助商飯局，仲有私人生日會，我個人好抗拒，覺得冇辦法配合到，所以冇再出席喇！」
亞姐無后冠
「良心電視台」無良行徑陸續有來！過去二十年以來，亞姐后冠都是冠軍佳麗的獎品，可是王征主政下的亞姐選舉，后冠都只是道具而非獎品，應屆的馮雪冰，至今仍未收到該屬於她的后冠。至於冬至當日收大信封的四名藝員戚黛黛、張啟樂、「車車」張紫櫻和陳綺雯，炒魷原因，其實也只為慳皮。
「佢哋四個係王征入亞視之前簽落嘅，有人話佢哋太高薪喎，其實都係兩萬蚊一個月，但就俾人借啲意開刀。其實有啲人到依家都冇返過洗腦班，咪一樣冇事。」知情者說。
亞視開台以來，相信只有示威跳馬舞的王征，係最騎呢的老闆。王征常接待內地富豪參觀亞視兼搞party，一班亞姐就要戴住后冠在現場做接待兼三陪，陪飲陪唱陪跳。
向亞視請大假的馮雪冰，唔使被迫上洗腦班，開開心心去旅行，還把相片放上微博。
騎呢老闆，就會搵騎呢人做洗腦班導師，爆嘴爆胸的花姨講選美心得，但成班被迫上堂的藝員，睇表情就知個個淨係得個虛殼敷衍返學。
亞姐亞軍王加敏因跟亞視執行董事盛品儒稔熟，有免死金牌，故返學遲到都相安無事。
四大男寵
聽王征話有獎賞！「亞視之子」亢帥克準時上堂有人工加，月薪僅過萬的他，加薪超過一成雖然唔算多，不過身為王征愛將，經常獲老細點燈出埠賺騷錢，財來有方。亢帥克外，同是「星光幫」的古卓文、黃文韜及年僅十八歲的楊正軍，同樣得到王征「寵幸」，故被亞視內部人封為「四大男寵」。
「王征成日點名要佢哋陪佢出埠，離境見客有騷錢計，佢哋驚冇下次影響收入，所以好聽話。近期最得寵嘅係楊正軍，十八歲卜卜脆，王征俾好多機會佢，仲點名拍微電影同做埋倒數騷司儀。雖然亞視慳皮掛帥，但王征對來自內地嘅黃文韜就好闊綽，俾埋宿舍佢住。」知情者說。
記者致電楊正軍，對於被點名陪老闆出席內地活動，他驚青回應：「我唔清楚，總之公司叫我就出席，我唔敢亂咁講嘢。（咁你有冇出席內地陪客活動？）我有，都係啲正常客戶活動。」
