周柏豪自認牛郎冇時停

周柏豪不單集型英帥於一身，更有一排煞食的「朱古力」身形，迷倒萬千少女的他竟然高呼恨拍拖！不過他自言似隻牛，橫衝直撞冇時停，因此女友最好都是勤勤力力，快快手手，唔係遇着懶人會很易吵架！


為了演唱會，周柏豪苦練一身肌肉。周柏豪自言是隻牛，希望有位勤力女友。

型男周柏豪為了演唱會，苦練「朱古力」身形，外形Man爆的他大談理想女友的條件：「今年我有一首歌叫《拿愛情給我》，其實就係表達我喺現實生活中渴望愛情，希望有人錫、有人愛。（理想女友的條件？）一定要有愛心、修養、仲要錫屋企人！」他更笑言自己是一頭牛，故對方不能是懶人：「我為咗做嘢可以連覺都唔瞓，我係一隻牛，橫衝直撞永遠都唔會停，所以對方唔可以係懶人，如果唔係一家火星撞地球，好易吵架﹗」

盼新年健康啲
一向以孝順見稱的周柏豪，早前為免婆婆離世前會有所牽掛，故刻意向婆婆隱瞞將舉行演唱會，以免她想欣賞又不能欣賞而不開心，他說：「今年初佢都有嚟睇我第一次舉行嘅音樂會，咁佢嗰時睇咗就已經無遺憾！」雖然婆婆離世已幾個月，但他坦言仍未釋懷：「《無力挽回》呢首歌我係為婆婆而作嘅，其實每次聽嘅時候我都會喊，因為其實我對婆婆嘅離世仲未釋懷，始終我同佢相處咗差不多廿八年。」

此外，周柏豪指自己在2012年體弱多病，所以即席揮筆繪畫一個大隻仔，希望自己在新一年能健健康康，像畫中人般強壯。

化妝：Kris Wong
From:http://orientaldaily.on.c ... /00282_097.html

周柏豪前晚開騷，造型成隻奴隸獸咁款，仲大玩SM元素，俾幾位女舞蹈員鎖鏈誘惑、摸胸扯衫兼騷肌肉，真係令粉絲大飽眼福。

周柏豪前晚在九龍灣展貿舉行頭場「Imperfect Concert2012」演唱會，他頸上扣上三條鎖鏈，造型十足奴隸獸。他在台上與穿上性感黑絲的女舞蹈員激玩SM，有女舞蹈員捉着柏豪的手撫摸自己胸部，或做趴地誘惑，其中一位女舞蹈員更扯開柏豪衣衫，令他大騷結實腹肌。

鍾浠文激吻

柏豪除邀請張敬軒、鄭融擔任嘉賓外，還請了緋聞女友鍾浠文及連詩雅表演，但連詩雅因病缺席。負責伴舞的鍾浠文穿上連身內衣，露出迷人半股，並主動將柏豪拉埋身邊激吻起來，令粉絲嘩聲四起。

柏豪整晚不停唱錯歌詞及入錯key，自彈自唱《六天》要三次才能成功，但表示不介意，他說：「越錯得多越high，咁先係Imperfect（不完美）嘅地方。認識我嘅朋友都知我患過情緒病，但多工作就冇事。」


柏豪與緋聞女友鍾浠文在台上激咀，鍾更露半pat。



柏豪操到身材甚fit，可惜唱功麻麻，不時走音甩嘴。

憶婆婆哽咽

演唱會中亦有令人感動的地方，當柏豪憶起過身的婆婆時，邊唱邊哽咽及眼濕濕。事後栢豪表示感覺到被舞蹈員摸到其重要部位，但澄清自己沒有觸碰對方。問是否擔心女友呷醋？他避談說：「唔關事，父母在場要檢點啲。」

From:http://hk.apple.nextmedia ... 121230/18117712