今年《歡樂滿東華》善款數字攀升至九千萬，破晒紀錄。事前有份拍《東華》宣傳片的「卡拉之星」台柱魯振順和王俊棠，當日竟然冇影，留低薛家燕獨撐大局。
原來魯振順和王俊棠驚孭數，一早同無綫講明唔撈，王說：「對家燕姐唔好意思，話晒佢先係今年真正嘅『卡拉之星』。」而仆心仆命為節目學韓文練騎馬舞的薛家燕，反而冇份拍宣傳片，難怪她心灰意冷宣布明年唔再玩，她說：「我諗極都唔明點解冇份拍！」
「卡拉之星」四散，從此星光黯淡。
搞足33年的《歡樂滿東華》，新意一年差過一年。有見及此，無綫決定將焦點放在騎呢出位的「卡拉之星」環節上，早前就特登搵來台柱魯振順、王俊棠和王維德拍攝練唱宣傳片。
薛家燕帶領曾志偉及一眾藝人跳唱hit歌〈江南Style〉，夠晒氣氛，可惜薛家燕已決定明年唔再玩。
當日魯振順和王俊棠冇去《東華》助陣，但二人就齊齊到荃灣出席齋宴。唔使孭數，只係唱歌助興，輕鬆得多。
無綫上月已為《東華》宣傳，無間斷播放魯振順、王俊棠和王維德的宣傳片。結果貨不對辦，難怪有網友嗌回水。
王俊棠：好似呃人咁
不過上周六（8日），《東華》舉行期間，魯振順和王俊棠卻現身荃灣為一個佛教慈善齋宴做義工。王俊棠得悉記者來意後，馬上自動投案，他說：「搞到我好似呃人咁，真係唔好意思！」之後他解釋因為試過俾認捐者走數，所以才拒做「卡拉之星」。他續說：「有個老闆朋友應承咗捐錢，但撞正股市唔好冇俾到。但條數已經報咗上去，筆錢惟有要自己孭番，都有成五位數㗎！做咁多年都攰喇，除非有老闆捐十萬指定話要我唱啦！」
身邊的魯振順亦插嘴，坦言做「卡拉之星」吃力不討好，由頭到尾都一腳踢。他說：「我哋唔同其他藝人，可以搵總理捐十萬表演一個項目。我哋啲錢有血有汗，約人食飯飲茶、搵人捐錢，做衫、排舞、搵歌全部一腳踢。」他更向記者大爆試過在《東華》後台有不愉快經歷，感覺不被尊重。「有次我喺後台仲俾人大大聲叫『行開啦！唔好阻住我哋上台呀！』」記者再三追問，魯振順依然口密，他說：「哎，我體諒佢可能做到半夜肝火盛，我唔嬲啦！嬲咪即係搵自己笨！」
奀星多過乜
除幾個台柱外，參與「卡拉之星」的藝員一向是零知名度的奀星。連魯振順和王俊棠都話唔玩，今年卡拉之星的排行榜中，噏得出名冇乜邊幾個。
手語變鼓神
早年靠邊做手語邊唱歌而彈出的王維德，今年竟然棄用撒手鐧手語，轉玩打鼓。氣勢強勁，可惜他條熱褲大煞風景。
阿Bob繼任
薛家燕明年唔玩，她說：「咁有後起之秀嘛，我都特登搵阿Bob（林盛斌）嚟幫手。」結果阿Bob冇令人失望，他反串扮肥肥和「巨聲二幫」陳國峰錫錫，惹全場起哄。
「卡拉之星」由凌晨一點播到三點，於是曾華倩愈夜愈猖狂，竟然一手㩒住阿Bob重要部位，她解釋擔心Bob會走光喎！
無綫明知故犯
宣傳片有份，但現場no show，無綫今次擺明出術。對此魯振順說：「其實無綫搵我拍宣傳片時，我即時表明自己今年唔做，但公司話冇所謂喎！」而王俊棠亦說：「對家燕姐真係唔好意思，話晒佢先係真正嘅『卡拉之星』嘛！」
兩位台柱冇影，當晚「卡拉之星」的確全靠薛家燕。事後薛家燕向記者透露，她一早收到風知道魯振順和王俊棠唔玩，「佢哋話收唔到數，要自己孭好慘！好彩我冇試過被走數，真係多謝啲老闆幫忙，所以頭先我叫停晒啲音樂，都要讀晒啲善長芳名。（你冇份拍宣傳片喎？）咁我又冇嬲！哈哈，但我又真係諗極都唔明噃！呢個環節太夜啦！加上腳痛，又唔想欠咁多人情債，所以以後都唔再參加喇！」
連薛家燕都話唔玩，「卡拉之星」隨時封咪都似！
卡拉唔OK
1998年在《東華》出現的「卡拉之星」全名是「全台藝員卡拉之星大唱遊」，所有無綫藝員均有資格參加，藝員自發性向外籌款，善款最高的十位藝員，均可在節目唱歌。這個已有14年歷史的環節，當然經歷不少起跌。
起步期
最初此環節深受不少藝員歡迎，甚至連正在上位的小生花旦如湯盈盈等亦有參與。
高峰期
隨着《東華》其他環節愈搞愈悶，「卡拉之星」慢慢成為《東華》的重點項目。04年薛家燕更為此環節吸過百萬善款，而魯振順、王俊棠等搞笑高手亦因而彈出。
衰落期
08和09年薛家燕患胃炎兼要入院割膽石，被迫停玩「卡拉之星」兩年。結果08年只有何傲兒等奀星出現，愈來愈黯淡。
網友點睇
《東華》多年來冇進步，收視平平無奇，但觀眾對於「卡拉之星」多數有讚冇彈，不過就覺得魯振順和王俊棠唔玩令環節失色不少。
