外傳老公有80億身家嘅葉玉卿，上月底返港拍賀歲片《我愛HK2013恭喜發財》，講到明唔係為錢出山全為過戲癮。但周三（12日）有週刊報道指佢同老公胡兆明喺美國嘅生意唔多掂，私人飛機被扣、因欠債要拍賣手持物業、而經營嘅旅行社破產，就連喺紐約開嘅銀行亦危危乎，搞到卿卿要即日開記者會。
卿卿開記招力撐冇撲水
佢好勞氣話：「如果拍戲可以救到生意，我賴死唔走啦！做生意梗係有賺有蝕啦，二千幾萬啫，我蝕得起喎！」對於週刊報道指老公欠債，卿卿就話：「我哋欠呢間公司嘅錢一早已經還咗，佢哋強行扣押我哋隻飛機，依家係我哋告緊佢！」
不過「一代艷星」今次返港，行頭的確弱咗啲，有私人飛機唔坐要坐民航客機，手袋用幾千蚊嘅Burberry。以前日日戴住嘅鑽戒首飾統統欠奉，出入坐電影公司嘅貨van，住嘅又唔係總統套房。話晒都係80億富婆喎，點都唔係好襯。但卿卿就咁講：「我今次返嚟拍戲好開心，唔需要孭住名牌手袋，戴十卡鑽戒，我覺得咁大粒唔舒適，我好享受呢六日拍戲嘅過程。」之後，佢仲話會對相關報道保留法律追究權利。
得得得，點都好，媽咪姐梗係希望卿卿繼續富貴幸福，最好每年都返來一次拍戲say個hi啦！
十指空空
周三（12日）傍晚6點半，卿卿喺現居嘅都會海逸酒店開記招。提到報道指佢老公胡兆明爭人周身債，仲話佢復出為撲水，卿卿激動到騷晒十隻手指話：「我都唔鍾意戴嘢喺身嘅，想做番自己。」
口口聲聲話唔鍾意戴首飾嘅卿卿，06年佢老公胡兆明間銀行喺紐約開張，佢戴住閃爆鑽飾示人，係人都知佢有米啦！
阿女獨撐
老公唔喺身邊，好彩仲有大女Victoria（右）同助手撐場。同卿卿似足餅印嘅Victoria仲手揸iPhone 5，扮記者拍低成個記招。
當年卿卿（右一）係亞姐季軍，同屆嘅朱慧珊（左一）同冠軍黎燕珊（左二）都先後失婚。希望幸福咗16年嘅卿卿繼續做闊太啦。
