曾經公開「自殺」嘅Shirley關淑怡，決定重新做人，仲搵咗已故天后梅艷芳嘅經理人Marianne，幫佢安排工作，明年二月再踏紅館開騷。
雄心壯志再上征途，但上個禮拜五（十二月七日），Shirley孖住周汶錡周麗淇兩姊妹出席錶行活動，又係另一回事。活動後Marianne同在場記者講：「Shirley趕住走，不如文字同電子傳媒一齊做訪問啦！」
行有行規，文字同電子傳媒向來分開做訪問，既然如此，在場記者於是捉住周氏姊妹風花雪月，無強人所難。Marianne見勢色唔對，即刻捉住電子傳媒同Shirley做訪問，再安排文字記者留步慢慢傾。
無論係講自己仔仔嘅事，抑或問佢點睇曾志偉打人，Shirley都有問必答，究竟係佢抗拒傳媒，定係經理人擺錯姿態呢？既然Shirley都肯由頭嚟過，做經理人嘅無謂做攔路虎！
見現場記者只係同笑容滿面嘅周氏姊妹花做訪問，Marianne（箭嘴）立即安排Shirley同傳媒坐低慢慢傾，仲有問必答。
以前Shirley甚少出席呢類商品活動，但為咗爭取曝光率，都要破例，只係繼續冇乜笑容。
