千呼萬喚，息影16年的葉玉卿終於復出拍邵氏賀歲片。出名孤寒的無綫，以往拍賀歲片搵星客串，都係俾一封內有「無言感激」字條的利是作酬勞，今次力邀葉玉卿出山，竟有「現兜兜」美金。不過住宿加機票係卿卿自費，加埋自聘兩私人助手，卿卿擺到明貼錢開工。
坐擁80億身家的卿卿又點會同無綫計較，周日（2日）晚她與秘密來港的老公胡兆明嘆日本菜，之後再埋位拍通宵戲。已為人母的卿卿在寒風中，竟透胸兼飛釘，重演闊別多年的「擋不住的風情」。
45歲的葉玉卿闊別娛樂圈16年，終於復出接拍曾志偉監製的賀歲片《我愛HK2013恭喜發財》，與譚詠麟合演一對夫妻。上周六（1日）凌晨她由美國返港，雖然連續飛了十多小時，久違了的她風采依然，身材亦未見走樣。對於一時技癢返港拍賀歲片，億萬富婆卿卿一落機不忘晒幸福，「以前拍戲為生活，依家可以體驗吓為興趣拍戲嘅感覺！」講到明為興趣唔講錢。
透視誘惑~周日（2日）晚10時許，葉玉卿晚飯後步出，孭住5萬Chanel手袋的她，打扮看似密實，但在閃光燈下，深啡色上衣竟有透視效果，更因當晚氣溫驟降凍到飛釘。向老公通水
卿卿見門外有大批記者，即打電話說：「你唔好出嚟住呀！出面有好多記者。」話口未完，老公胡兆明已從食店跑出來，雖未肯回應一句，仍笑笑口任影。
自聘助手~今次來港雖拍戲兩星期，但卿卿都自掏銀包請了兩名女助手，負責照顧她及安排每日工作。
住海景套房~以往一家大細返港，卿卿大多入住五星級酒店的總統套房，由於今次只有她一人，故入住每晚約8千元的海景套房。
客貨車接送~雖然是億萬富婆，但卿卿為人隨和，無綫安排普通客貨車送她到拍攝現場，她都絕無詐型，亦無黑面。
收美金片酬
片酬對卿卿雖然不再重要，但都不能太肉酸。卿卿表明只收「友情價」片酬，無綫亦識做，據知情人士透露：「TVB呢幾年請串星拍賀歲片都係俾封利是仔，前年仲俾人唱話利是入面得張字條講多謝。鬼咩！套戲有過百演員，個個俾片酬成本咪好揦脷。不過今次唔同，卿卿由美國返嚟，仲係由樂易玲同曾志偉親自游說，點都要俾啲誠意，酬勞都有兩、三萬美金㗎！卿卿亦好體諒，話住宿同機票自己出，因為佢一定要住好啲。」
卿卿於上周六晚抵港即入住位於黃埔的九龍海逸君綽酒店海景套房，每晚房租約8千元，逗留兩星期單是酒店房租已達11萬，再加頭等來回機票及聘請兩名貼身女助手，估計今次來港拍戲花費超過20萬。
大漢擔遮~卿卿肯出山為邵氏拍賀歲片，劇組亦當她巨星般看待，派出兩名大漢左右護駕，為她擔遮擋雨。
帳篷擋雨~卿卿與張嘉兒、莊思敏及黎諾懿等後輩首次合作，眾人躲在大帳篷下避雨，要由幾位猛男抬起帳篷，送他們到同一條街的拍攝場地。咁大陣仗，都係第一次見。
不忘孝順母親
周日（2日）晚卿卿老公胡兆明忽然現身，兩夫婦在酒店對面的日本餐廳撐枱腳。據知胡兆明本來要到國內開會，該晚專誠抽空留港陪老婆，點知食完飯卿卿即要埋位開工，還要拍通宵戲，飯後胡生惟有獨自返回酒店休息。
卿卿面對記者的追訪並不抗拒，更企定定接受訪問：「今次返嚟拍戲，順便探吓89歲嘅媽咪，佢已經十年冇飛去美國探我喇！我好希望每年12月都返香港探佢，以前我只係顧住做嘢賺錢，忽略咗佢都唔知，不過佢從來冇怨過半句。做咗人媽咪就會諗返轉頭，成日都好掛住佢，想孝順佢多啲。」百行以孝為先，錢對卿卿來說絕對微不足道，最緊要係一家人齊齊整整。
卿卿息影後移居紐約，大女Victoria13歲，兩子亦已11歲及9歲，今次來港兩周，最不捨得竟然是大女。日前卿卿收到女兒爆喊的短片，非常心痛。志偉為加強賀歲片卡士，親自力邀多年好友卿卿客串，咁有誠意，仲有幾萬美金酬勞，真難得。
網友贈興
卿卿行性感成名，80年代出的大碟〈擋不住的風情〉大賣，拍的三級片如《卿本佳人》亦叫好叫座。今次出山，應該勾起唔少港人的回憶，網民亦對她重出江湖議論紛紛。
支持派~柴台派
