【今日我至凸】卿卿噚日拖囡囡現身黃埔，可能因天氣太凍，卿卿不慎凸點。
■喺美國多年冇返香港，卿卿母女梗係要食地道嘅粥粉麵。
【黃埔】嫁咗去美國嘅葉玉卿息影十六年之後，今年返香港拍賀歲片《我愛HK2013恭囍發財》，順便探望差唔多90歲半身不遂嘅母親，侍母至孝。不過身為廿四孝媽媽嘅卿卿，因為抵唔住留喺美國嘅大女兒齊齊過百嘅短訊同眼淚攻勢，所以叫囡囡自己搭飛機嚟香港會合佢。
逛超市黑卡埋單噚日3點幾，卿卿跟囡囡離開黃埔海逸酒店，到附近嘅粥麵店醫肚，卿卿拖住囡囡時仲不自覺飛釘，佢話呢兩日都唔使開工，對於志偉牽涉入黃浩俾人掌摑事件，卿卿話：「唔係好信志偉摑人，玩吓啫。」之後兩母女行返酒店。
■葉玉卿話唔信志偉會出手打人，就算係都玩吓喎！
■卿卿同囡囡前日喺黃埔一超市揀生果。
而前日卿卿就帶囡囡喺黃埔探媽咪，佢哋喺媽咪屋企坐咗差不多一個鐘之後，佢就同囡囡去咗附近嘅吉之島日式超級市場shopping。兩母女好有默契，一入到超市，卿卿負責推車仔，囡囡就喺度揀貨。
卿卿老公胡兆明喺美國開超市起家，兩母女對行家嘅商品自然精挑細選，佢哋每樣物品都攞上手細心睇件貨嘅成份，對一啲有機商品、生果包括香蕉等情有獨鍾。
當日唔少超市客人都認得卿卿，其間仲有男fans上前要求合照，卿卿都二話不說應承，仲派囡囡擔任攝影師，卿卿最後用黑卡埋單。
