【今日我至癡】聲稱一個人返香港嘅卿卿，前晚被發現同老公胡兆明（右圖）喺紅磡撐枱腳，認真癡纏！走先嘅卿卿離開時仲打電話通知老公有記者。
【紅磡→尖沙嘴】淡出娛圈16年嘅葉玉卿，上星期返香港拍賀歲片《我愛HK2013恭囍發財》，本來卿卿話今次自己一個返港，但前晚記者竟然見到佢老公胡兆明出現。前晚近7點，卿卿離開入住嘅紅磡酒店後行去對面爐端燒開餐，食到夜晚9點走人，佢邊行邊講電話：「我埋咗單㗎啦，出邊有記者，我轉頭先打畀你。」跟住返上酒店。冇幾耐胡兆明離開餐廳，問佢係咪專程陪卿卿？佢好怕醜咁耷低頭，然後一支箭返酒店。
■祖藍話見到卿卿時好緊張，諗唔到卿卿仲叫佢教做戲。
■江欣燕喺《我愛ＨＫ》中以經典嘅Maria造型出現。
■卿卿噚日凌晨首次開工，工作人員見落雨就為卿卿撐起巨型帳篷。
爆囡囡狂喊卿卿噚日凌晨12點幾喺尖沙嘴首次為賀歲片開工，同場仲有江欣燕同王祖藍等。由於落毛毛雨，工作人員幫佢撐起帳篷，真係服侍周到。卿卿話：「以為玩吓，點知新聞出咗開始緊張，都想自己有啲戲、有啲表現。」會唔會傾新劇本？佢話：「可能，要等我試吓時間配唔配合到，試吓擺低仔女得唔得先，今次一落機已經收到個女嘅片，佢歇斯底里喊30秒，我心都裂埋。」
