台慶劇《大太監》平均收視有成31點又有口碑，唔只帶挈黎耀祥有機再攞視帝，連帶其餘幾位太監都成為城中熱話。
人紅當然乘機搵錢，好似飾演凌添壽的蕭正楠，連環北上狂接夜場騷，連走四個城市賺人仔，每場唱15分鐘已輕易賺20萬人仔；夜場司儀仲要用「TVB一線紅星」形容佢，有錢搵又有滿足感。難怪蕭正楠話：「我供車供樓都係靠登台咋！」
無綫上週公布台慶頒獎禮提名名單，黎耀祥係視帝大熱唔在講，其餘太監蕭正楠、黃浩然同陳國邦都有份角逐其他獎項，《大太監》將播到12月頒獎禮前，隨時大擸獎項。
蕭正楠在廣州夜場獻唱，只演一場已袋20萬人仔，收入隨時多過喺TVB捱一年。雖然表演只得15分鐘，主辦單位仍為蕭正楠印製全幅海報，靠他的靚仔樣已足夠達宣傳效果，全場爆滿。
蕭正楠登台的夜場Lili Marleen位於廣州，屬於當地高檔娛樂場所，當晚入場費收100蚊人仔。歡迎TVB一線紅星蕭正楠先生！
夜場主持以一線紅星形容蕭正楠，台下歡呼尖叫不斷用手機拍照，場面墟冚。
夜場出動20名保安護送蕭正楠（箭嘴）離開，人牆外則萬人空巷，排場有如超級巨星。因《大太監》帶挈，蕭正楠除密密接內地騷之外，上星期再赴澳門為一個會所表演，更派簽名相給觀眾。
連踩四地
在劇中出賣其他太監兄弟搞到眾叛親離的添壽蕭正楠，趁太監熱密密接騷，月初套劇一上就北上往夜場演唱，廣州、深圳、上海、福州連走四個城市。
早前他獨自去到廣州人氣夜場Lili Marleen演出，每位入場費100元人民幣，只見可容納約2百人的酒吧人頭湧湧，凌晨一時DJ以「TVB一線紅星」來介紹蕭正楠出場，蕭正楠一踏上舞台，觀眾即湧到台前歡呼狂叫，十足劉華上台一樣，台下更有粉絲舉着寫有蕭正楠名字的燈牌尖叫，非常瘋狂。
「都係稱呼啫」
劇集收得蕭正楠感情亦穩定，今年10月他駕車載住緋聞女友何傲芝去食飯，其間與小巴相撞要報警解決。不過蕭正楠仍然否認：「佢唔係我女友，普通朋友之嘛！」《蘋果日報》圖片
蕭正楠首先以廣東話提醒觀眾記得收睇《大太監》，然後多謝黎耀祥：「我要多謝黎耀祥，佢現實就好似戲入面咁係我師傅。」接着便獻唱由祥仔主演的《義海豪情》主題曲，台下不斷歡呼拍掌，蕭正楠一邊唱歌一邊忙着跟觀眾握手。
他全晚只唱了4首歌，出場大約只有15分鐘，據酒吧負責人透露，蕭正楠表演一場已穩袋20萬人仔。難怪蕭正楠事後說：「ok啦，我每月供車供樓都係靠登台咋，『一線紅星』呢啲係我嘅目標，都係一個稱呼啫，大家唔使咁介意嘅！」做太監做到變一線，蕭正楠唔怕閹多幾次呀！
添壽結局：淪落街頭
蕭正楠在《大太監》飾演的添壽會變成奸角，殺掉胡定欣及出賣其他太監兄弟，結果淪落街頭慘淡收場。
蕭正楠02年以歌手身份入行，翌年打敗死敵余文樂、麥浚龍奪「勁歌男新人金獎」，因在慶功宴上大叫「邪不能勝正」而被封殺，08年簽TVB拍劇。
太監有話兒
黃浩然~呢套劇令我哋四個做咗好朋友，好恨一齊再拍一套劇，時裝都冇所謂。《大太監》令我接多咗商場騷，希望套劇可以攞多啲獎啦！
陳國邦~為咗套劇我買咗兩本講太監嘅書，參透太監嘅心理性格，今次提名「最佳男配角」，想唔想攞獎就等如我問你，你想唔想中六合彩吖？
開騷海鮮價
內地夜場喜歡請香港歌手藝人表演，但騷價十分浮動，喺香港走紅唔代表騷價高，價亦可能急跌，反而TVB有劇出嘅小生叫價一向硬淨。
楊思琦插水
視帝黎耀祥一向有在內地接騷，騷價同蕭正楠一樣20萬人仔，無綫出品叫價都好啲。
楊思琦飛李泳豪形象跌至谷底，今年初演出東莞內地騷由以往3萬一場跌至1萬，為賺奶粉錢都冇計。
安德海曹永廉連開三鋪
一年開三鋪都是太太主意，曹永廉更稱太太對他的演技十分挑剔：「佢畀好多意見㗎，不過家人一定多挑剔，所以我聽祥仔同國邦講嘢多啲。」開拍第一場戲就是飾演太監安德海的曹永廉上青樓召妓，遭演妓女的蔣家旻又錫又摸，但他不覺尷尬：「因為係家旻做主動，我只係瞇埋眼等佢錫，事前溝通過，但佢尷尬過我啦！」
爭2年就50嘅新高登baby face男神曹永廉，在《大太監》中飾演無間道安德海，最後壯烈犧牲，角色討好。現實中他當然唔係太監，而且有個美滿家庭，與太太育有一仔一女；太太姜依蘭（姜大衞女兒）經營的童裝店開業一年半，已經在中環、金鐘及九龍灣開3間分店，他說：「我廿幾年前設計過童裝仲做埋行街（sales），家老婆都搞得幾好㗎！」
第一次演太監，曹永廉說要多謝祥仔及陳國邦教戲：「祥仔教我要感受咗個角色至講對白，否則冇靈魂；國邦就教我要了解啲四字成語，做太監亦唔一定要乸型。」可惜他未能提名台慶頒獎禮，惟有期待下套劇《金枝慾孽2》及拍攝中的《法網囂雄》啦！
擁有幸福家庭的曹永廉，育有四歲兒子和一歲半女兒，不時在微博晒恩愛。
曹永廉冇份角逐台慶頒獎禮，他在微博稱「頒獎禮慳番唔使返」，更約埋同樣被觀眾讚、但落空的黃智賢食飯，被指同無綫搞對抗，他解釋：「我好失望，套劇未播完就公布名單，我覺得自己係輸運氣。」
