【今日我至笑】薛凱琪前日同方大同行街睇衫，其間方大同到薛凱琪狂笑標淚，仲要用紙巾抹，究竟方大同對佢講咗啲乜咁好笑？DV圖片
【中環】薛凱琪（Fiona）身邊一直都有一批觀音兵，好耐之前就有緋聞男友房祖名，兩個人散咗之後，就有個不離不棄嘅方大同喺Fiona身邊。前日Fiona又搵咗方大同做伴，下晝1點左右，佢哋先去到中環ifc一間叫「禮」嘅日本料理食午飯，到差不多3點，食飽飽嘅佢哋就好滿足咁離開。當日戴住頂賊仔帽、頸巾同粗框眼鏡嘅方大同，望落去成個福祿壽嘅李思捷咁款，反而Fiona孭住大袋、一頭長髮，睇落仲清新好多。
不停畀意見Fiona同方大同之後行咗去連卡佛睇衫，當然主力都係Fiona買啦，不過方大同就好樂意陪靚女。Fiona先去咗睇手袋同鞋，見佢睇得好投入，不時攞起啲鞋問身邊方大同嘅意見，作為Fiona嘅首席諮詢員，方大同交足功課，聽到佢畀咗好多意見。咁仲唔止，一向不苟言笑嘅方大同，原來女仔都有一手，睇睇吓嘢，就見佢引到薛凱琪笑到標眼淚，要用紙巾抹。行咗大概15分鐘，佢哋發現有記者，就好避忌急急腳走人。
