「草蜢森巴大戰軟硬fans演唱會」終於喺周日晚（4日）圓滿落幕，跳舞出身嘅草蜢喺尾場更加搏盡，蔡一傑直情跳到企上欄杆，媽咪姐都睇到一額汗！鬥足12場嘅草蜢同軟硬，最後打和。蘇志威喺慶功宴上就話，蔡一智為兩隊組合嘅音樂攞個平衡，而每晚台上所講嘅心底話都由林海峰寫晒，讚佢兩個係幕後功臣。但話口未完，林狗就喺開香檳時玩嘢，搞到一手都係，再趁機將啲香檳抹晒落蔡一智大髀。嗱，講蠱惑，始終都係靠把口搵食嘅林海峰多計。最終回，媽咪姐判軟硬贏！
蔡一傑操得fit膽又大，唱唱吓就衝落台跳上欄杆，好high！
嚟到尾聲，五子叫現場觀眾開晒手機嘅電筒扮星光，又自己拎部iPhone出嚟喺台上自拍，有啲依依不捨。林狗開香檳搞到成手成地泡，蘇老闆、蔡一傑即刻彈開。
點知林狗趁阿智唔覺，一手抹晒啲香檳落佢條褲，仲偷笑㖭！見拍檔出招，阿葛又將口入面啲香檳嘔番入個樽度，OMG！
