草蜢將於六月再次跳入紅館舉行演唱會，三子笑言開騷目的是要歌迷出汗、嗌破喉嚨的減壓大派對，三子今次更決絕禁出DVD，要觀眾親身感受現場High爆氣氛的難得體驗。
蔡一智（左起）、蔡一傑及蘇志威意見一致，務求令入場觀眾得到最High感覺。
跳唱組合草蜢將於下月舉行一連六場「BE THREE GRASSHOPPER IN CONCERT」，距離開騷只有過個多月時間，三子每日排舞、練歌、Keep Fit。不過他們反而心情愈興奮，期待與歌迷在紅館開「喪唱喪跳」的大派對。
歡呼掌聲永不厭
蔡一傑稱每次都享受與歌迷互動：「佢哋畀力量我哋，我哋會雙倍奉還。」蔡一智亦稱：「演唱會經常會講『好需要你哋嘅掌聲同尖叫聲』，雖然句說話老土，但其實係真嘅，只要觀眾畀到好強烈反應我哋，嗰種力量似足法拉利踩行油好High。（即係聽極唔厭？）唔厭，多多益善，好興奮。（你哋需要歌迷？）三子齊聲說：「梗係啦，絕對係，唔係點解要一年一度？佢哋餓草蜢，我哋都餓歌迷啲叫聲。」
三人近日經常開會，已成為例牌節目。
草蜢唱遍世界各地，發現到任何地方巡唱，觀眾都會出現同一個現象，就是嗌到聲嘶力竭，全身濕透出晒汗。問可有護聲心得？阿智笑言：「冇用嘅，佢哋入嚟主要目的係『求沙』，佢哋平時冇乜機會唱爆、嗌爆場館。咁我哋仲趁草蜢有能力令大家爆聲濕身，都係一種功德嚟。見到人哋開心，係在所不辭去做。」
三子笑言未買飛入場的觀眾將會有好大損失，事關他們決定今次演唱會絕不會推出DVD：「好似電視劇咁，如果有得睇重播大家就唔會珍惜睇即場嘅機會，我哋演唱會出名好有現場氣氛，睇DVD又點體會得到，所以我哋索性唔出DVD。」
未決定邀請嘉賓
提到草蜢演唱會記招當日，好友張智霖、黃子華、林嘉欣、林德信都來撐場，是否兼任嘉賓？他們笑言：「佢哋嚟目的好明顯啦！咪就係攞演唱會囉！」
三子坦言仍未決定邀請嘉賓，因今次是史無前例設「A餐、B餐」，單雙數日子會有不同曲目演唱，暫定唱50多首歌。問開六場夠不夠喉？蘇志威謂：「冇話夠唔夠，我哋一直係做個好睇，而唔係做多場數嘅演唱會。」
from:
http://orientaldaily.on.c ... /00282_075.html
