無綫劇《金枝慾孽貳》俾觀眾嫌悶鬧爆，收視麻麻，難怪女主角之一伍詠薇（伍姑娘）之前要密密宣傳谷戲，難得有啲時間，伍姑娘前晚8點同老公練海棠，約埋老友蔡一智兩公婆、蔡一傑同另一位朋友，喺銅鑼灣利園一間意大利餐廳飯敍，飲吓白酒吹吓水。見素顏嘅伍姑娘同佢「愛人」傑仔傾偈嘅時候，表情有啲激動，唔知係咪呻緊劇集收視唔多理想呢？
伍詠薇前晚同老公、蔡一傑及蔡一智兩公婆喺銅鑼灣晚飯，食足三個鐘。伍姑娘主演嘅《金枝貳》收視麻麻，前晚見佢全程同傑仔傾偈但冇笑容。
草蜢乘機谷碟
伍姑娘呢餐飯食足三個鐘，至夜晚11點成班人齊齊離開，練海棠搭住伍姑娘膊頭出嚟，十足好兄弟咁，喺街度同傑仔拜拜後，記者問伍姑娘係咪同朋友訴苦講收視唔多好？佢話：「唔擔心收視，好多人睇，梗唔係同朋友訴苦啦！冇壓力，盡咗做藝人嘅責任，追落去好睇㗎！」阿智就好醒目，見記者訪問伍姑娘，即刻遞上草蜢之前同軟硬合作嘅演唱會影碟，乘機宣傳。
練海棠搭實伍姑娘膊頭，同蔡一傑（左一）講拜拜。伍姑娘（左一）吻別周雪芳（左二），而蔡一智（右二）就攞自己隻碟出嚟宣傳。
from:
http://hk.apple.nextmedia.com/entertainment/art/20130512/18256839
