伍姑娘噚日為咗谷新節目，着住黑喱士透黑bra上陣跳K-pop。
伍詠薇最近為有線主持節目《伍姑娘真識食》，為咗呢個節目，佢碌盡人情卡，廣邀圈中好友為節目擔任嘉賓。噚日伍姑娘就邀請咗排舞師Sunny同組合BOP（天堂鳥）上節目，人到中年學跳K-pop嘅伍姑娘，豁出去以黑色喱士透黑bra性感上陣，展現誘人體態及魅力。
BOP對住性感嘅伍姑娘，好坦白話唔夠膽直望。
老公讚好
喺節目度伍姑娘同Sunny排咗隻舞一齊表演，摸頭、批踭、扭腰、走步、坐椅子擘腿都難唔到伍姑娘，佢笑笑口話：「我都喘晒氣，四十幾歲先第一次跳K-pop，之前零跳舞經驗，今次用咗兩個零鐘去學，算快上手。」
講到性感舞衣，伍姑娘話：「平時展現女人味，今次要配合K-pop，又唔可以扮少女，要有大人態度，少女就騷長腿，我就騷啲打晒底啦。」性感獲得老公練海棠御准？伍姑娘話：「佢唔會介意，仲好支持我，何況今次跟天王排舞，我係癲后，有晚着住bra同底褲跳，咁先可以睇到體態，老公煮晚飯一路睇住我，佢話跳得幾好。」首次同火辣人妻伍姑娘合作嘅BOP就話：「我哋有啲怕醜唔敢直望，佢啲眼神仲好凌厲有電力㖭！」
撰文：馮仁昭
馮仁昭
from:
http://hk.apple.nextmedia ... 160413/19568364
