死寂如金融海嘯業主急劈價半成辣招首日十大屋苑零成交

政府再連出兩招打壓樓市，成效備受社會關注。在新辣招生效首日，樓市基本上完全「停晒」，十大屋苑全線零成交，部份驚青業主更即時減價賣樓，個別減幅近半成，至於元朗的新盤，更有多達一半的買家「縮沙」。

記者：朱連峰
近年樓市瘋狂，政府更被指打壓樓市軟弱無力，上周五終出重手，連出兩招壓抑樓市升勢，包括「加強版」額外印花稅（SSD），以及被批評過辣的買家印花稅。所有非本港永久居民、本地及外地註冊公司，在現有印花稅上，再額外徵收15%買家印花稅。

政府出重手，不少本港市民及外地客紛紛趕在措施昨日生效之前，前晚漏夜趕搭入市尾班車，以避開新稅網。中原地產首席分區營業經理楊文傑表示，鰂魚涌康怡花園B座有單位在周五晚劈價11.1%至675萬元售出。

「好耐未試過靜成咁」

辣招生效首日，樓市觀望氣氛極為濃厚。全港十大屋苑昨日全線零成交，如此死寂的市況與2008年金融海嘯時相似，怕樓價跌沒人敢買樓，只有部份肯減價的單位才見承接。美聯物業黃浩存表示，全個將軍澳昨日只有兩宗買賣，「好耐未試過靜成咁」，其中維景灣畔7座一個695方呎單位，減價10萬元至560萬元成交。

美聯物業黃錦瀚亦指出，沙田第一城昨日雖然睇樓量多，但全部「得個睇字」。第一城多達15%業主肯減價，但由於並非勁減，只略減5萬至10萬元，買家嫌減得少不買。世紀21日昇黃文龍表示，北角和富中心12A座高層C室，899方呎，原叫價980萬元，政府出招後即將叫價調低4.3%至938萬元，但仍乏人問津。

昨日有消息傳出，有印巴籍外地客一行近十人，昨日到紅磡海逸豪園逐間代理行搵樓，但要求買賣合約日期填為「10月26日」，以避開非本地買家的15%買家印花稅，但因偽造文件及逃稅屬非法行為，故沒大行敢做。但有消息稱，這組印巴籍買樓團昨購入至少一伙，傳為9座一單位，成交價約1,500萬元，若成功改合約買家可慳225萬元。

尚悅半數買家「縮沙」

政府出重招打擊外地客來港買樓，新盤即時首當其衝。恒地及新世界的元朗尚悅，原定昨日發售，但為了避開新辣招，提早周五晚發售，即晚售約220伙。但措施生效後，昨只售約60伙，內地客更完全銷聲匿迹。中原指該行有半數買家昨日「縮沙」沒有到場揀樓。發展商稱大部份買家為香港永久居民，平均一人購入一伙。另外有三個全新樓盤計劃最快下月推出，包括長實長沙灣一號．西九龍和新地將軍澳天晉II期，不排除為吸引買家，會調低意向價。

三位局長昨日重申打壓樓價立場，當中發展局局長陳茂波出席電台節目時就說，政府出招是希望做到快、狠、準，認為毋須擔心引入買家印花稅會降低本港競爭力。運輸及房屋局局長張炳良表示，政府推出穩定樓市兩招，是要避免樓市泡沫爆破，影響經濟金融及民生，又相信增加額外印花稅不會令單位供應減少。他強調今次是「非常時期推出非常措施」，希望令樓市重回正軌。

睇樓客心聲丁先生：政府做得未夠，應該限制外地人買港樓，而非只徵收15%買家印花稅。

歐小姐：贊成政府再出招，但唔影響我入市意欲，因為我都係買嚟收租。

內地買家：香港樓市不錯，（記者：點睇港府新措施？）不覺得很麻煩。

蘋民洗版
【Leo Wu】如果呢招無效，又會影響到啲細價樓，如果買貴價樓成本增，咁啲外來買家會轉投細價樓，多競爭下細價樓遲啲咪又升番，咁咪更加難上車。

【Andy McEveley】政府終於有項德政，買賣講供求，以往政府只顧增加供應，拒絕壓制差不多等於無限大嘅大陸需求。今次終於做番啲嘢。

【Peter S.Tang】幾好噃，對真正買樓自住的人影響很小，對炒家收重稅，益吓政府，抑制炒風，睇吓有冇效。

【Fanny Fong】政府終於肯出辣招，今次要畀個讚給政府。真係買樓自住的人，又點會三年內放售呢？樓市被內地人炒到天價，政府早就要出招啦。

【Nd Chan】額外印花稅會收窄盤源，應改為100%買賣差價，咁仲炒乜鬼。

節錄自蘋果日報facebook留言