鄭嘉穎被打爆右眼，工作人員急忙幫佢止血。微博圖片
現年43歲嘅鄭嘉穎前日喺昆山拍攝電視劇《葉問》，同年輕新手龍虎武師對打時，因反應慢咗半秒，俾對方手踭批中右眼，劇組方面都好緊張，即刻安排嘉穎返港醫治。
鄭嘉穎喺昆山拍《葉問》嗰陣俾對手打傷右眼，痛到掩眼瞓地。
有疤仲型前晚嘉穎回港即撲到港安醫院睇傷勢，高層樂易玲同好友黃智賢仲陪佢入院，因為傷口幾大，嘉穎要留院一日，噚日下晝點幾先出院返屋企休息。樂小姐話嘉穎個傷口縫咗成10針，佢會留喺香港休養一星期，拍劇方面因為眼未消腫而暫停，原本噚日喺瀋陽有活動都被迫取消，家要等下星期拆咗線先決定工作安排。噚日凌晨三點，嘉穎喺微博報平安：「已回港診治，安好，不用擔心。但真的很抱歉，明天不能到瀋陽跟大家見面了！」
前晚11時15分戴咗黑超嘅嘉穎單拖回港，右眼貼咗塊大膠布嘅佢話：「係自己問題，冇乜嘢，縫兩針得啦，多謝大家關心。」佢仲話男人有疤仲型，至於可擔心破相時，佢即驚一驚話：「應該唔會啩，好小事。」
此外，同嘉穎傳過緋聞嘅苟芸慧噚日喺尖沙嘴出席活動，佢話睇報紙都知嘉穎受傷，會傳短訊畀佢。
