啱啱同金融才俊男友分手嘅李彩華（Rain），近期又捲入前老闆娘趙雪英同寰宇主席林小明嘅離婚爭產案，林生曾向法官申請內庭審訊，最終被法官reject，所以喺內地拍劇嘅Rain，11月會返香港講真相。
早前，難得返香港兩日嘅佢，就約咗個friend去大坑「潮民」打邊爐傾吓。當晚Rain見到個friend開心晒，全程食唔停，仲好似開籠雀一樣，邊食邊講。難得有位「順得人」，肯聽佢訴苦又唔介意佢噴晒口水，仲陪佢坐足幾個鐘。呢啲咪好朋友囉！
唔好睇Rain鋼條身形，查實佢不知幾咁擦得，肥牛、芝士腸全部放入口，真係得天獨厚。Rain邊食邊講，把口真係好唔得閒，難得佢朋友咁有耐性，細心聆聽。
周二（23日）Rain上載咗張疑似露點自拍照上微博。但佢回應話無露點，最後刪除咗張相。咦，呢排是非多，要小心嘞！
