韓國人氣歌手朴載相（PSY）的〈江南Style〉MV熱爆全球，就連肥監製錢國偉（Wilson）亦向他致敬，處男下海抄足PSY，並將MV改名為〈HK Style〉。
肥Wil今次擔正男主角，好友古巨基及鄭伊健亦幫手執導及友情客串，但MV中最矚目莫過於他的過氣緋聞女友賈曉晨（JJ），有傳兩人當正印女友「賓治」陳宛蔚無到，趁拍攝空檔失蹤3小時。
本周一（15日）錢國偉專登帶女友到澳門高級餐廳撐枱腳補鑊，離開時陳宛蔚忍不住拋下一句：「我知有女想埋佢（Wilson）身。」至於JJ男友樊少皇收到風JJ姣黐錢國偉，即由內地撲返港，仲被影到密會前妻霞女。呢段五角關係認真錯綜複雜。
45歲的錢國偉其貌不揚，但監製過的綜藝節目有收視有口碑。捧女有一手，難怪不少新女、𡃁模願意「on call 24小時」陪玩陪食，務求躋身做小花。最近他的〈HK Style〉MV，過氣緋聞女友JJ騷腿拋飛吻引誘他，而錢的正印女友陳宛蔚（賓治）只能做布景板。鏡頭前的錢國偉與JJ卿卿我我，有指兩人拍攝當日更公然撇低劇組外出食飯近3小時，女友陳宛蔚唔嬲就假。
許志安風騷
本周一晚（15日）在澳門拍完MV，錢國偉與Big 4分道揚鑣。肥Wil低調約會女友，許志安與助手們離開酒店時，卻表現得非常興奮，與在場記者揮手道別。
錢國偉與女友陳宛蔚在酒店內的Beijing Kitchen食晚飯。背向餐廳門口坐的錢國偉亦放低戒心，邊食邊與女友談心。
本周二（16日），JJ男友樊少皇被拍得與舊愛陳少霞在中環面燶燶前後腳行街。發現記者後，兩人更極速分開行，有指今次是樊向對方攤牌。
JJ義助肥Wil
知情人士爆：「JJ知道肥Wil拍呢個MV，趕緊劇都同無綫講要度期放佢拍兩日。佢仲不時打俾肥Wil問佢有咩要配合。肥Wil見佢咁落力，最後俾佢做女主角。拍攝當日佢當眾向肥Wil拋媚眼，猛問做得似唔似原作嘅金泫雅，唔得嘅話可以再放啲。」JJ與現任男友樊少皇一直分隔兩地，只靠電話同微信溝通，兩人不時為此吵架。JJ寂寞難耐，加上錢國偉對她痛錫有加，難怪JJ當了肥Wil是樊的替身。而原本身在內地拍劇的樊少皇，收到風JJ和肥Wil關係曖昧，亦急急腳返港，與前妻陳少霞攤牌，藉此向JJ大派定心丸。
女友出鏡：在錢國偉的〈HK Style〉MV內，女友陳宛蔚亦義務為她伴舞。在其中一節，錢攬住她跳舞，不過她的出鏡率不算高
JJ做女角：擁有一雙媚眼的JJ，成功電暈錢國偉，坐正做MV女主角。在MV內，JJ亦攞正牌與他大跳騎馬舞。
女友去澳門𥄫實
本周一（15日）晚上八時，錢國偉與女友陳宛蔚在澳門Grand Hyatt酒店的Beijing Kitchen晚膳。現場所見陳宛蔚心事重重，錢國偉則全程做主動，不停講笑話女友開心。
據知錢國偉此行到澳門，是為Big 4拍MV，陳宛蔚則做跟得女友。知情者透露：「Calinda（陳之洋名）知有好多女黐埋肥Wil身邊攞着數，佢一向都隻眼開隻眼閉。但之前神獸『白雲』喺新加坡拍外景時跟肥Wil返酒店房，Calinda開始提高戒備。自此肥Wil出埠開工，佢有時間一定跟埋去𥄫實男友。」
本周一（15日），本刊在澳門碼頭訪問陳宛蔚，不施脂粉的她，相當避忌。對於男友與JJ的緋聞，她說：「我冇睇報道。（好多女想埋肥Wil身喎！）我知，佢一向都係筍盤嚟，哈哈，佢有咩靚女未見過。」身旁的錢國偉亦斬釘截鐵說：「我冇同JJ撻着！（同女友喺澳門食飯補鑊？）我今次嚟澳門係做嘢，同佢（指陳）食餐飯啫！」說罷隨即拉住女友行入候船室等候。
同晚，JJ出席《名媛望族》活動時回應：「唔好搞我！我拍MV當日都要趕返廠拍劇，邊有三個鐘時間同Wilson出去。」對於會否向陳宛蔚解釋，她說：「唔需要同佢解釋，但遲啲會約佢出嚟食飯。」
錢國偉被本刊拍得與女友撐枱腳後，同晚他將Big 4的MV製作花絮放上微博，證明自己到澳門「做嘢」，非為補鑊。
抄捉9成
雖然錢國偉的〈HK Style〉MV，明抄韓星朴載相（PSY）的〈江南Style〉MV。但勝在有JJ、曾志偉、古巨基等助陣，令肥Wil突然爆紅。
林曉峰
眾多串星中，以曾志偉同林曉峰扮得最神似，由髮型、服飾以及舞步都跟足原裝
MV於上周四（11日）放上Youtube，經社交網站瘋傳下，不足一星期的點擊率已達63萬多人次。
