兩年前被指拋妻棄子嘅樊少皇，不顧一切同賈曉晨（JJ）一齊，雖然年紀相隔10年，但係就愛得痴纏。不過最近有傳佢兩個分手，前晚樊少皇隻身去九展《一個人的武林》首映禮，問佢分手嘅事，佢就不停耍手擰頭想避走，仲話訪問只談電影，不談感情。
樊少皇
樊少皇跟賈曉晨拍拖兩年，感情穩定，未有結婚打算。資料圖片
「生仔隨緣」
樊少皇對分手嘅事處處迴避，不過JJ噚日接受電話訪問時話：「我冇乜特別喎！傳聞你都知喇，一係分手一係結婚喇！我都慣咗喇！我哋又唔係分手又唔係結婚。正常囉！同以前一樣。」咁JJ幾時結婚先，年紀都唔細，佢話：「如果真係結咗婚會同大家講，結咗一定講。我哋唔想一日到黑講感情，感情想私人啲，生小朋友就隨緣喇！想順其自然。總之唔係新聞寫嗰啲，我有我工作，佢有佢工作，都有時間相處，自己想儘量低調，唔想講太多！」
而噚日JJ喺將軍澳出席一個節目錄影時，又被問到感情事，佢話：「唔好為咗去維繫呢樣嘢去做，應該一齊就唔會分開，最緊要兩個人舒服，唔係要做畀人哋睇。」
撰文：馮仁昭
from:
http://hk.apple.nextmedia.com/entertainment/art/20141029/18915644
