JJ賈曉晨高潮眼再現，嚇窒古惑仔

鄭伊健呢排成日同班古惑仔兄弟包括陳小春、錢嘉樂、林曉峰同謝天華等，四出為11月嘅紅館騷做宣傳，前晚佢拉隊去將軍澳電視廣播城錄影無綫節目《超級無敵獎門人終極篇》，古惑仔組成「消失的光陰」隊Vs賈曉晨（JJ）、麥長青（麥包）、陳嘉桓同古明華嘅一隊。

JJ前晚喺電視廣播城錄影《獎門人》時，佢嘅經典高潮眼再現，嚇到伊健彈開。

嘉樂：屋企隻乸好惡

喺《獎門人》見到JJ，梗會諗起佢玩啜乒乓波時嗰對高潮眼，曾志偉係咁叫班古惑仔同JJ玩啜乒乓波，JJ一埋位就現高潮眼，至於班古惑仔個個有老婆，擺明怕返屋企俾人罰企扭耳仔，所以同JJ玩啜波時好避忌，唔敢同JJ咁接近。阮兆祥見JJ現高潮眼就笑問：「你有冇諗住乜人？」JJ即大發嬌嗲：「啲風吹我先咁！」就算小春對住陳嘉桓，一樣唔敢玩得放，志偉笑問：「怕丁丁（應采兒）呀？」小春話怕陳嘉桓師傅冼國林，最後有一對咀咗，不過係麥包同林曉峰。

玩食辣辣壽司時，其中一part林曉峰輸咗，佢話係嘉樂累佢要食，點知嘉樂還擊：「你以前都冇咁好戲，過咗亞洲（亞視）真係好戲啲！」林曉峰寸番嘉樂：「你都越嚟越似盛品儒，不如索性去亞視啦。」到唱爆波環節，林曉峰要講生仔秘方，嘉樂又要講點飛女，其中佢講笑：「屋企隻乸盈盈好惡！」另外要伊健講會令人面紅嘅嘢，嘉樂竟然教佢講夢遺，估唔到伊健照講。

JJ同錢嘉樂玩得咁投入，小心有人俾人罰扭耳仔喎。

麥包（左）同林曉峰玩到真咀，回味無窮。

林曉峰為演唱會操肌，伊健掀起佢件衫晒成績。

原來伊健第一次嚟《獎門人》，問到係咪唔准講老婆蒙嘉慧（YoYo）？佢笑話：「唔會，我都有成日提。YoYo冇話嚟睇，可能知我實輸。」至於網民話天華喺無綫拍咗好多套《乜乜狙擊》劇，佢都話：「係㗎！嚟緊可能有《街市狙擊》、《幼稚園狙擊》。」

版主：陳基征
from:http://hk.apple.nextmedia ... 130912/18419076

由「蠱惑仔」變成「蠱惑佬」的鄭伊健、陳小春、謝天華、錢嘉樂、林曉峰與陳嘉桓、賈曉晨（JJ）等前晚為《獎門人》錄影，未知是否五人都已為人夫和人父的關係，面對青春無敵的陳嘉桓和JJ都顯得相當避忌。而五子自己合作玩遊戲時，就大顯兄弟情，一舊壽司五份食，但就有欠衞生!

伊健與賈曉晨玩「啜乒乓波」時相當避忌，不敢啜埋去。

鄭伊健、陳小春、謝天華、錢嘉樂、林曉峰與陳嘉桓、賈曉晨（JJ）等前晚為《超級無敵獎門人終極篇》錄影，早已成為「老襯」的五人可能為免被家中嬌妻扭耳仔，與陳嘉桓和JJ玩遊戲時均十分避忌兼保持距離，天華和伊健與JJ玩「啜乒乓波」時，都只敢望着JJ的招牌「高潮眼」，完全不敢啜埋去。而嘉樂和小春亦盡顯「怕老婆」本色，嘉樂先表示「我屋企隻乸盈盈好惡o架」，而小春亦自爆老婆對他說最多的話是：「喺邊度、同邊個、做緊乜、快啲返、返嚟餵奶、掃風、唔好識埋啲豬朋狗友、你好自為知」等，十分搞笑！

另外，在「拍拍拍」環節時，因五子都不能吃辣，因此每次都將一舊壽司分五份，五人一人咬一啖，盡顯兄弟情，但就有欠衞生，最後天華忍不住將放了入口的「飯」噴出來︰「舊飯4、5個人舔過喎！」

陳嘉桓轉數快
很少上遊戲節目的鄭伊健笑言今次來玩是「畀面派對」：「以為有啲兄弟係獎老可以睇實我，點知佢哋唔做。（有咩唔講得？）都ok，上得嚟預咗玩。（可以提老婆蒙嘉慧？）冇所謂，我成日都提，係你哋唔寫咋嘛。（老婆唔嚟睇？）有咩好睇，佢知我玩遊戲唔叻，實輸！我做運動就ok，好彩兄弟多！」

謝天華（左起）、林曉峰、鄭伊健、錢嘉樂及陳小春玩遊戲時相當齊心。

謝天華最後一個將壽司放入口。

陳嘉桓笑言自己轉數ok。

而首次玩「獎門人」的陳嘉桓被問到轉數如何時，她笑說：「我諗都ok快。（怕被人挖苦？）唔怕！上嚟大家開心！」她透露將開拍網絡小說改編的電影：「大約10月拍，個故事係講倫敦金。」

文︰影視組
From:http://orientaldaily.on.c ... /00282_055.html