盈盈昨日刻意用絲巾遮肚，又不自覺以手護肚，據知她已懷有三個月身孕。
娛樂喜事又一宗，繼周家蔚和姚樂怡今年先後出嫁後，其好姊妹湯盈盈也將於今年底與拍拖5年的錢嘉樂拉埋天窗，據悉盈盈樂樂今次是奉子成婚，雙喜臨門。嘉樂昨日親口承認早前在蘇梅島向盈盈求婚成功，盈盈當日還含淚答應。盈盈昨日則透露年底先與樂樂註冊，問是否有身孕時，她默認有喜說：「唔講得住。」
現年37歲的湯盈盈終告別盛女行列！揚言明年才迎娶女友的錢嘉樂，早前與女友盈盈到蘇梅島旅行時，趁機向盈盈求婚，一直恨嫁的盈盈含淚答應，二人將於今年底拉埋天窗，趕及做龍年新郎新娘。據知盈盈現有三個月身孕，今次是奉子成婚，雙喜臨門。
嘉樂被問到盈盈是否有喜，他表示適當時會公佈，默認雙喜臨門。
盈盈、樂樂拍拖多年，終修成正果，可喜可賀。資料圖片
錢嘉樂昨日為鄭伊健個唱綵排，接受訪問時公佈喜訊。
「會喺香港擺酒」嘉樂跟女友盈盈去完蘇梅預支蜜月，昨日他為鄭伊健演唱會綵排，問是否已經秘密結婚？嘉樂笑到四萬咁口說：「未結，就嚟結，好快註冊，會係今年內。」是否奉子成婚？他鬼馬說：「如果講得時候會向大家講。」在旁的鄭伊健、林曉峰（阿Lo）和錢國偉即時起哄大嗌恭喜，但取笑他還未講新娘是誰？嘉樂抵死反問：「高海寧唔係，苟芸慧都唔係，大家都知，我諗佢（盈盈）喊緊。」
問在哪裏擺酒？嘉樂笑說：「家有兩樣嘢諗緊，本來想同獎門人（曾志偉）60大壽一齊環遊世界，原來好多嘢要交代，應該會喺香港擺酒，今日講住咁多先，詳情鄭伊健27號演唱會講，不過好開心同大家分享呢件事，喺結婚呢個範疇林曉峰係大師兄，今朝同獎門人講，我未聽過獎門人笑得咁開心，27號揭曉錢嘉樂願意娶邊個為妻。」
伊健、阿Lo及演唱會監製錢國偉昨聞得嘉樂宣佈喜訊時即上前恭喜，伊健謂不介意被嘉樂搶閘，其後伊健更在微博上載一張攬住嘉樂的合照說：「好兄弟，恭喜你踏入人生另一個階段！」阿Lo也在微博恭喜嘉樂做老襯。
盈盈昨晚在無綫拍攝《老表，你好嘢》，她晚飯時發現記者即笑笑以大孭袋遮肚，並謂：「你哋搞到我好緊張呀。」對於嘉樂自揭求婚成功，盈盈難掩興奮說：「係呀，佢求咗婚，拍呢套劇前我哋去咗蘇梅島旅行，兩個人都應該係時候，所以佢一求婚自己即刻應承，好開心。」有否感動到喊？她說：「總之好開心，雙方父母都知道。本身計劃出年至結，但今年係好年。」
盈盈為出嫁歡呼是否雙喜臨門？盈盈故作神秘說：「唔知呀，方便時先至講，到要宣佈時先至宣佈。本來諗住獎門人曾志偉出年60大壽先至一齊搞，但家先註冊，擺酒就未知。」言下之意似是為腹中BB而趕註冊，盈盈未有否認，只說：「唔講得住。」是否很喜歡小朋友？盈盈說：「你睇我微博都知我鍾意小朋友啦。」那麼是否拍完《老表，你好嘢》後停工？她謂：「唔係，做得越多越好。」嘉樂求婚時有否送禮物？如戒指等？盈盈甜笑說：「冇，送咗甜言蜜語畀我。婚禮會交畀Toby（梁靖琪）搞。」記者恭喜她榮升錢太，盈盈竟情不自禁歡呼說：「終於真係做到啦。」
原來盈盈對嘉樂求婚成功一事極度保密，她的一班好姊妹昨日表示完全不知情。佘詩曼昨接受本報電話訪問時說：「當然戥盈盈開心，但我哋成班姊妹好憤怒（因不知情），結婚嗰晚一定會報復，唔會放過湯盈盈。」那現在只剩阿佘未嫁，阿佘說：「只剩我？我壓軸呀，係咪勁！」文頌嫻則說：「咁口密？好開心！等到頸都長啦！每個婚禮都講緊佢哋幾時結婚，最好快啲啦，唔使等到年尾，反正有人認頭，生咗個BB出嚟先，可以同我、周家蔚個BB差唔多大，開心啲！」
姚樂怡也表示不知情：「吓？真係唔知喎，咁秘密。我哋成班朋友有個group chat，要問吓先。梗係戥佢哋開心，我終於可以做姊妹。」問盈盈是否奉子成婚，姚樂怡說：「係咪大肚？咁容易，不如畀我先。」周家蔚也說：「好開心，到時要做姊妹，盈盈冇通知可能係怕醜，呢啲嘢應該男人話事，所以我唔會放過錢嘉樂，等佢好好記住要對老婆好啲。」
