草蜢同軟硬即場玩吞熱狗，仲大講不文嘢。
草蜢同軟硬將會喺10月25至30日、及11月1至4日喺紅館開騷，佢哋噚日喺紅磡舉行記者會，由於賣飛反應熱烈，宣佈加開10月24日，一共11場。草蜢同軟硬分別打扮成海軍同水兵，喺記者會先比試一下，大玩拗手瓜、吞熱狗等遊戲，要現場投票哪一隊勝出，其間軟硬吞熱狗時大玩不文。草蜢同軟硬對住舉牌嘅bra top女郎眼甘甘，不時要求合照，因為蔡一傑仲係單身，所以唔攬男人致攬住女郎條小蠻腰。
一傑從後攬實索女條腰，其他人得個睇字。
海軍鬥水兵問到五人喺紅館點樣大戰，林海峰話：「今日海軍鬥水兵，到時睇吓邊個係跳舞海軍、邊個係講笑水兵，希望歌迷可以同我哋打真軍，到時最搞笑可能係蔡一智，最大隻嗰個未必係蔡一傑，其實我哋今次個騷有並肩又有大戰。」
今次第三度加場，開到11場，但阿智依然負債纍纍，林海峰講笑話：「如果急歌迷所急，我哋唔介意唱到年尾。」
葛民輝講笑咁話：「我哋五個人嘅期都未度齊，可能有場係草蜢，有可能係軟硬，又或者蔡一傑單拖做，佢恨咗好耐啦。」
