曾經係圈中發電機嘅張慧儀，自從返咗大陸搞家族食品生意之後，媽咪姐都有幾年未見過佢！最近呢位39歲嘅美艷熟女先學人開微博，呢幾日就上載咗啲着住行政look做女強人嘅相上去。
張慧儀依家長居北京，要打理生意，又要照顧囝囝。佢話自己都請咗保母幫手，但始終都係鍾意親手湊仔囉。
除咗坐office嘅相，佢仲擺咗好多張5年前收養嘅養子Hanson嘅生活相。患咗先天嚴重心臟病嘅Hanson，依家已經8歲大，而醫生一早講咗呢個病好難醫，能夠活到今日已經係奇蹟！不過喺微博入面，張慧儀就講到明會努力賺錢醫好個仔，唔少網友都讚佢有善心。媽咪姐就覺得家陣佢雖然冇乜化妝，但無論外在內在，都比以前靚多多聲呀。
以前濃妝艷抹，依家就洗盡鉛華坐office，甘於平淡。
03年，張被舞王未婚夫霍紹裘打傷，之後淡出娛樂圈，至今未婚。咁有愛心嘅靚女，唔憂嫁嘅！
