洪天明與周家蔚將於今年7月到馬爾代夫舉行浪漫婚禮。
洪金寶長子洪天明與06年港姐亞軍周家蔚拍拖3年打風都打唔甩，二人並準備今年拉埋天窗趕快造人。據悉，洪天明與周家蔚已定於今年7月在馬爾代夫舉行浪漫婚禮，然後再返港補擺喜酒。準新郎天明昨在電話中笑說：「係有咁嘅打算，但啲嘢未定。」
徐子淇02年與洪天明分手後，於06年下嫁恒基兆業集團主席李兆基幼子李家誠成為千億新抱，誕下兩女後至月前再第三度懷孕。洪天明就先後跟模特兒Lillian和27歲港姐亞軍周家蔚拍拖，並數度跟周家蔚傳出婚訊。
月前天明與周家蔚情侶檔搵食拍攝婚紗照，猶如預演婚禮。
擬返港補擺酒
今年2月天明與周家蔚以情侶檔姿態出席活動時，更坦言希望今年結婚生仔，但事隔多個月只聞樓梯響。近日天明終有決定，據知他將於今年7月偕周家蔚在馬爾代夫舉行浪漫婚禮，記者昨日致電天明求證時，他說：「係有咁嘅打算，但啲嘢未定。」是否廣邀親友赴馬爾代夫觀禮？天明說：「未知，仲研究緊，未必全部去晒，因為去到咁遠，又機票又酒店，可能之後再返嚟擺酒。又或者喺嗰邊搞一個party都唔定。」
洪金寶盼抱孫
即將榮升老爺的洪金寶，昨日表示還未接到天明通知，但難掩興奮說：「係咩？我未知，你咁快知嘅？」問會否買定金器送給未來新抱時，他笑說：「冇呀，買唔起呀，啲金太貴！」
問到會否催天明婚後趕快生仔？洪金寶笑說：「呢個由得佢哋，我都唔係控制佢哋嘅人，佢哋有佢哋主意、有佢哋生活，經濟前途係點，由佢哋去諗。不過，我願望就梗係希望佢哋結婚就生仔啦，但願望歸願望，總之恭喜佢哋啦，我都開心嘅！」
七小福成員元華繼長子結婚後，細女亦於上月底下嫁金融才俊，對此洪金寶深表羨慕說：「係囉，華哥就好啦，上晒岸啦！」
http://hk.apple.nextmedia ... ;av_id=15260422
