現年50歲的莫少聰和47歲的孫興，上周五在北京分別因為涉嫌吸毒和涉嫌藏毒被捕，二人圈中友好聞訊後莫不感到愕然。為莫少聰產下10歲囝囝莫鎬廉的洪欣，昨聞言後雖感驚訝，但強調很久沒與莫少聰聯絡，不會致電給他，也不打算將莫少聰被捕之事告訴囝囝。
繼名模Rosemary去年在美國涉嫌藏毒被捕後，近年主力在內地發展的莫少聰，上周五（15日）在北京亦因涉嫌吸毒而被北京警方拘捕，而同日身在北京的孫興則因涉嫌藏毒被捕。對莫少聰和孫興被捕，二人的圈中友好均十分關注。
洪欣：咁大件事！
莫少聰舊愛、於00年為莫少聰產下囝囝莫鎬廉的洪欣，昨在電話中聞得舊愛涉吸毒被捕，感到極度驚訝，她說：「咁大件事？唔係吖嘛？真定假o架？喺內地邊度？我真係冇聽過，我又冇乜朋友同佢來往接觸。」會否打電話跟莫少聰聯絡了解？洪欣說：「我諗呢個時候都唔方便，同埋我都冇佢電話。」會否將莫少聰被捕消息告訴囝囝？洪欣說：「我諗唔會囉，而且都未證實。」深信洪欣此舉無非是不想囝囝擔心。
問洪欣過往認識的莫少聰有否接觸毒品？洪欣說：「我諗呢個時候乜都唔方便講，家都冇證實任何嘢，所有關於佢嘅嘢我都唔方便回應，我同佢都冇來往。」洪欣09年與內地演員張丹峰結婚，而莫少聰08年曾表示有意與內地演員女友洪雁結婚，但二人於09年分手。
孫興前妻聞訊驚訝
對於孫興與女友在北京涉藏毒被捕，他的前妻林美貞昨日獲悉時很訝異，她表示與孫興已協議離婚4年，但雙方還沒簽字，也一直瞞着兒子，林美貞對於前夫涉藏毒被捕，她表示：「我不方便回應。」
林國斌對好友莫少聰被捕亦表示不知情，他昨在電話中說：「我、何家勁同聰仔都好好朋友，廿幾年朋友，不過自從07年陳志舜喪禮之後都冇見過佢，只係知佢喺北京同上海發展。」他續說：「可能飲嘢俾人『炸』（落藥）咗，唔似藏有咁嚴重，可以俾人告你販賣。」
跟莫少聰合作無數，包括《黃飛鴻》電影系列的鄭則士，昨日對好友涉吸毒被捕大感驚訝說：「係咩？幾時嘅事？喺邊度？我唔知道，我家喺橫店拍緊戲。」鄭則士還緊張地追問有何新進展。問莫少聰有沒有不良嗜好時，他力撐好友說：「佢好檢點，做好多運動，以前一齊拍戲時都有一齊跑步。」會否感到驚訝？他說：「好愕然。」會否打電話向莫少聰了解？鄭則士說：「家打咪好尷尬？唔通問佢係咪吸毒呀？如果真係有呢件事，佢家都接觸唔到外人o架啦。」
袁詠儀（靚靚）與孫興因合作劇集《花木蘭》而成好友，對於孫興涉藏毒被捕，靚靚十分震驚，昨日她接受電話訪問說：「吓！咁大件事，我真係唔知，其實同佢都有好多年冇見過面啦！希望佢哋吸取過今次教訓後，以後私生活可以檢點啲，佢哋始終係公眾人物，應該做一個好榜樣。」
from:
http://hk.apple.nextmedia.com/te ...462&art_id=15175629
