凸肚洪欣狂擦大晒

現年42歲嘅洪欣09年同後生11年嘅內地演員張丹峰結婚，而佢同前男友莫少聰所生嘅囝囝張浩鋒（前名莫鎬廉）亦跟繼父一齊生活。一直有指洪欣婚後努力造人想再追多個，結果佢終償心願，今年7月有讀者向本報爆料指洪欣懷孕14周，估計𠵱家洪欣已經懷孕5個幾月。早前見到洪欣孖住張丹峰去咗灣仔開餐，着住平底鞋嘅洪欣唔止肚凸凸，而且胃口非常好，孕味甚濃。

老公服侍周到

當日下午3點幾，戴住黑超嘅洪欣同老公坐的士到灣仔駱克道，好體貼嘅張丹峰落車之後，即刻幫老婆做阿四攞住個鮮黃色手袋，非常溫馨。至於着住鬆身衫嘅洪欣好似小鳥依人咁挽住老公臂彎漫步街頭。兩公婆先到一間潮州粉麵店開餐，原來肚餓嘅係洪欣，佢喺店內不停狂食魚蛋粉，胃口好好，老公只係陪坐。

孕味濃嘅洪欣早前同幫佢拎手袋嘅老公張丹峰喺灣仔行街。洪欣非常好胃口，一碗粉自己一個食晒，老公齋睇冇得食。

張丹峰最後喺潛水店買咗對手套，此行都算有收穫。

洪欣同莫少聰所生嘅囝囝同繼父張丹峰，相處融洽。

微博圖片
食飽飽出到門口，睇嚟已見肚嘅洪欣仲意猶未盡攞住袋炸魚皮外賣當薯片食，大肚婆果然零舍擦得。之後張丹峰去便利店買飲品畀老婆，你一啖時我又一啖，幾煙韌。跟住洪欣陪番老公去睇潛水用品，最後張丹峰買咗對潛水手套就走人。

採訪、攝影：梁繼光、羅德光
from:http://hk.apple.nextmedia ... 130925/18436513

蔡少芬昨與老公及大女一身桃紅打扮，與細女現身有份投資的童裝品牌活動。

蔡少芬（Ada）與友人合資七位數成立的童裝品牌「童夢工場」，昨日在金鐘Harvey Nichols登場。Ada與老公張晉帶同兩女兒現身，好友吳啟華、陳慧珊、毛舜筠、宣萱和姚瑩瑩等到賀，洪欣與老公張丹峰結伴前來，即場宣佈有五個月身孕，喜上加喜。

有咗五個月

42歲的洪欣09年與年輕11載的內地演員張丹峰結婚，她與前男友莫少聰所生的兒子張浩鋒現已13歲，昨日張丹峰全程傍實肚凸凸的洪欣，洪欣直認有喜說：「有咗五個月，未知仔定女，我打算喺香港生。我肥咗十幾磅，之前三個月嘔到黐線，未試過咁辛苦，嘔完肚餓，但食唔到嘢，聽到食物兩個字都想嘔。」

洪欣指現時已好轉，問到老公有否學湊BB時，她說：「未呀，老公緊張我身體狀況多過其他。呢胎會開刀，我會全面停工待產。」

Ada昨日跟老公及大女楚兒齊齊穿上桃紅衣服，楚兒並行catwalk示範童裝。抱住細女信兒滿場飛的Ada笑說：「希望生意越做越大，開多啲分店同埋上市。」

腹大便便的洪欣由老公張丹峰傍住到場，宣佈懷孕五個月。

吳啟華見到蔡少芬的細女肥嘟嘟，忍不住逗玩一番。

姚瑩瑩帶兒子跟宣萱祝賀老友榮升老闆娘。

繼續返內地

日前Ada在內地商演時發生疑似被綁架事件，她說：「今日唔想提唔開心嘅事，會交畀律師同經理人處理。」會否繼續返內地工作？她說：「會，唔返會蝕㗎喎！」她稍後便會到內地工作，但沒計劃請保鑣。
from:http://hk.apple.nextmedia ... 130927/18439514