殼王陳國強入主無綫成為新老闆，搞到曾經同佢傳過緋聞嘅花旦好似郭羨妮同徐子珊，馬上成為追訪目標。唔知係咪想同殼王劃清界線，郭羨妮咁啱噚日就喺微博高調晒新戀情，佢嘅新男友係內地武指朱少杰，郭羨妮仲貼出佢同男友頭貼頭嘅相狂晒幸福。
郭羨妮嘅微博唔單止有孖公仔相，佢仲留言話：「幸福，我等了很久，在我漸把期盼它到來的念頭忘記時，這個儍瓜出現了，他說：『我願意這輩子都給你欺負。』聽着淚水就湧出來了，這是我們的故事。」哇，係女仔聽到都一定冧晒啦，唔怪得有傳郭羨妮嚟緊四月會喺香港結婚做兔年新娘。
其實朱少杰喺內地唔少電視劇都有份做武指，郭羨妮去年暑假返內地拍咗朱少杰做武指嘅《宮鎖心玉》，兩人因此撻着，有傳佢哋已拍拖半年。郭羨妮最近仲同無綫請咗一個月假，唔知係咪留喺內地陪男友呢？
同郭羨妮好老友嘅馬浚偉，噚日喺電視城錄影，一講起郭羨妮有新戀情，仲話好快結婚，馬仔就話佢好口密，雖然之前聽到佢有人追，但就完全唔知情。講到郭羨妮情路崎嶇，馬仔話崎嶇嘅路完喇，之後一定會順順利利。
from:
http://hk.apple.nextmedia ... art_id=14985925
