無綫賀年劇《初五啟市錄》都啟市咗三個幾禮拜，但收視就一直插水，平均收視keep住得廿幾點，真係近年難得一見——咁低。媽咪姐收到風，監製梁材遠其實諗過點救亡，想搞多啲宣傳，點知女主角郭羨妮唔配合。知情人士話：「話晒呢套劇係Sonija（郭之洋名）產後復出頭炮，諗住佢會鬼咁緊張。點知套劇一播，佢竟然同公司請假，淨係做咗幾份報紙訪問咁大把。」
其實郭羨妮自從結婚生女後，真係放軟晒手腳，日日湊女已經心滿意足，連奶粉錢都懶得搵。今次佢向無綫請假，據知就係湊埋囡囡北上探老公班。對於郭羨妮唔宣傳一事，媽咪姐聯絡過《初五》監製梁材遠，佢無奈咁話：「Sonija係請咗假，咁佢要請假都冇辦法㗎！」唉，咁Sonija又真係爭唔落嘅！
郭羨妮喺開播初期出席過一次宣傳活動咁大把。今時今日咁hea爆嘅態度，唔抵幫。
郭羨妮自從下嫁朱少杰，生下囡囡Kylie，不時喺微博晒幸福。早兩日仲上載囡囡着棉襖嘅相（右圖），完全寄情家庭生活。
