謝安琪日前喺商台叱咤頒獎禮度攞女歌手銀獎時，佢提到自己畀外間嘅認識，似乎緋聞仲多過佢嘅音樂，佢仲形容自己係高學歷歌手，有周刊報道話Kay間接抬高自己身價，話自己係大學生，同時又貶低其他歌手，搞到楊千嬅睇唔過眼喺微博上反擊。噚日Kay到富豪機場酒店出席保良局活動時就勞氣否認，仲將槍頭指向傳媒，呼寃成日被抹黑、挑撥。
對於報道話Kay以大學生身份自抬身價，Kay話：「冇咁嘅事，重點唔係學歷，歌手講嘢係有意思，想分享自己心願，同學歷冇關，唔知係咪個編輯理解唔同，將焦點放喺學歷度，欲加之罪，何患無詞。」
Kay話自己係真心同大家分享，強調同影射楊千嬅絕對冇關係，內容只係想表達歌手面對嘅困難，對於會唔會擔心千嬅誤會，Kay說：「唔想討論，因為完全唔關千嬅事。」Kay話冇唔開心，但係佢好嬲咁指罵報道係炒作同挑撥，又話自己經常俾人抹黑，係個大陰謀。不過Kay話唔會因為咁而影響佢日後喺公開活動嘅發言，佢話做歌手唔可以太被動。
from:
http://hk.apple.nextmedia ... art_id=14836127
