樓市熾熱，好多人賣樓都賺唔少，蒙嘉慧（YoYo）就係其中一個。原來佢喺炮台山嘅物業早前成功出售，由01年買入時嘅200幾萬到600幾萬賣出，勁賺400萬，認真和味。YoYo噚日接受電話訪問時就話唔係刻意去賣樓，佢話：「只係咁啱有個朋友做呢行，加上個價又啱，所以咪放囉。今次都可以算係我人生第一次投資成功，暫時我就租屋住先，自己都有物色新地方，但係就要等適當時候先至再入市。」問到YoYo賺咗咁多錢之後係咪可以唔使做？佢就強調自己好鍾意拍戲，所以一定會繼續工作。
不過原來YoYo同無綫嘅合約，已經喺9月底完咗，佢希望可以同其他經理人合作，佢話：「我同TVB都合作咗十年啦，好想出去試吓，出邊嘅自由度又大啲，家我同TVB轉咗另一個合作模式。」咁會唔會考慮簽男友鄭伊健嘅經理人林珊珊，實行情侶檔搵錢呢？YoYo話：「唔會喇，林珊珊係一個好好嘅經理人，但我覺得工作還工作，男女朋友嘅工作一定要分開。」YoYo話家同幾間經理人公司傾緊，但都冇問伊健意見，因為呢啲嘢要靠自己決定喎！YoYo仲話：「現階段乜都唔想理住，放假去吓旅行先，二月先做決定。」
from:
http://hk.apple.nextmedia ... art_id=14770390
