草蜢前晚在紅館為一連八場的演唱會掀序幕，邀請了軟硬擔任嘉賓，軟硬大講棟篤笑，又踢爆蔡一智和蔡一傑曾爭嘢鬧交，葛民輝又手多多揸傑仔的pat pat，林海峰更提議傑仔追鄭中基，到時就可以與鄭中基大戰其前妻蔡卓妍和陳偉霆鬥唱《我們》，笑爆全場。
入行25年的草蜢前晚在紅館舉行首場「25 Grasshopper草蜢演唱會繼續忘我」演唱會，蔡一智、蔡一傑和蘇志威大唱多首經典歌曲，更不停跳足近3小時，傑仔戴上面具以一襲長裙獻唱張國榮的《紅》，猶如其師傅梅艷芳重現舞台。
前晚邀請了軟硬擔任演唱會嘉賓，他們一上台先唱改了歌詞的《A.E.I.O.U.》，歌詞內容更笑草蜢三子內訌兼咒傑仔繼續跳舞下去就會死，之後草蜢上台與軟硬合唱《絕對空虛》，五人更在台上跪地互拜，林海峰（阿Jan）勁讚說：「草蜢好犀利，連鮎魚都俾佢哋吹走埋。」
阿Jan和阿葛更在台上拿草蜢大玩棟篤笑，阿葛取笑阿智曾跳舞跳到個胃頂住個肺，並踢爆說：「蘇老闆最有EQ，佢哋一齊住時，傑仔同阿智成日鬧交爭緊嘢，佢就匿埋瞓覺。」阿智即更正表示冇爭東西，只是玩黑面。
阿葛又忽然手多多揸傑仔的pat pat，阿Jan又逐一評論三子，他說：「如果佢哋作個人發展，阿智頭髮長又夠瘦都分唔到男定女，佢就可以去海洋公園做哈囉喂，11隻手指好搶手，連鬼都驚。蘇老闆可橫掃歌壇，除阿姐同羅家英外就冇對手。至於傑仔又跳得又唱得，但係就贏唔到陳偉霆，除非追到阿Sa（蔡卓妍）啦。」
在旁的傑仔即大呼「黐線」，阿Jan續說：「唔係追鄭中基都得，可以同鄭中基大戰阿Sa同陳偉霆唱《我們》，如果分手就唱《失戀》，草蜢勁在連慢歌都跳舞，唯一對手就係黎明，黎明係唱快歌都唔跳。」完騷後，草蜢三子在後台接受訪問，傑仔笑言阿葛一向貪玩，他笑說：「佢唔係揸我『奶滋』，就係揸我pat pat啦，好朋友冇所謂。」
from:
http://hk.apple.nextmedia.com/te ...462&art_id=14587782
